Toshkent shahrida hamkorlikda o‘tkazilgan tezkor tadbir davomida Davlat statistika qo‘mitasi xodimi pora bilan qo‘lga tushdi. Bu haqda IIV matbuot xizmati xabar berdi.

Ma’lum qilinishicha, 2-mart kuni Toshkent shahar IIBBga korxonalardan birining rahbari ariza bilan murojaat qilgan. U o‘zi rahbarlik qilayotgan firma haqida Statistika qo‘mitasining elektron hisoblariga rekvizitlar xatolik bilan kiritilgani sababli Davlat statistika qo‘mitasi Toshkent shahar boshqarmasiga murojaat qilganida, boshqarma boshlig‘i o‘rinbosarlaridan biri firmaning STIR raqamlarini to‘g‘rilab, elektron o‘zgartirish kiritish uchun 200 dollar berishini talab qilayotganini bildirgan.

Mazkur murojaatga asosan, shu kuni Toshkent shahar IIBB JQB Korrupsiya va iqtisodiy jinoyatlarga qarshi kurashish bo‘limi hamda boshqa huquqni muhofaza qiluvchi organ xodimlari bilan hamkorlikda tezkor tadbir o‘tkazilgan.

Tadbir davomida Davlat statistika qo‘mitasi Toshkent shahar boshqarmasi boshlig‘ining o‘rinbosarlaridan biri ariza muallifidan 200 dollarni olgan vaqtida ashyoviy dalillar bilan ushlangan.

Holat yuzasidan Toshkent shahar IIBB huzuridagi Tergov bo‘limi tomonidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Avvalroq Olmaliqda tadbirkordan qariyb 10 mln so‘m pora olgan bosh muhandis ushlangani, Toshkentda tergovchi 1000 dollar, profilaktika inspektori esa 300 dollar pora bilan qo‘lga tushgani, Surxondaryoda hokim yordamchisi 5,5 mln so‘m pora olayotganda ushlangani to‘g‘risida xabar berilgandi.