Surxondaryoda jinoyat ishi bo‘yicha berilgan taftish shikoyatini qanoatlantirib berish evaziga sudyaga 1000 dollar pora taklif qilgan advokat ushlandi. Bu haqda Sudyalar oliy kengashi matbuot xizmati xabar berdi.
Maʼlum qilinishicha, advokat sudyadan Surxondaryo viloyat sudi ish yurituvidagi Sh.H.ga (birinchi instansiya sudi tomonidan Jinoyat kodeksining 168-moddasi 4-qismi “a” bandi bilan aybli deb topilgan, hukm apellyatsiya instansiyasida o‘zgarishsiz qoldirilgan) doir jinoyat ishi bo‘yicha berilgan taftish shikoyatini qanoatlantirib berishni so‘ragan.
Advokat ish bo‘yicha fuqaroviy daʼvogarning vakili bo‘lib, taftish shikoyati qonuniy ko‘rib chiqilishi tushuntirilishiga qaramay, takror pora taklif qilgan. Sudyaning bildirgisi asosida o‘tkazilgan tadbirda advokat daliliy ashyo bilan qo‘lga olingan.
“Moddiy manfaatdorlik taklif qilgan holda ishni o‘z foydasiga hal etishga urinish nafaqat korrupsiya, shuningdek, sud ishlariga aralashishning ko‘rinishlaridan biri bo‘lib, huquqiy taʼsir chorasi qo‘llanishiga olib kelishi eslatiladi”, deya qo‘shimcha qilinadi xabarda.
Toshkentning Uchtepa tumanida hokim yordamchisi 30 ming dollari olayotganiga qo‘lga tushgani haqida xabar berilgan edi. Olmazor tumani prokuraturasi tergovchisi 20 ming AQSH dollari miqdorida pora olgan vaqtda ushlangandi.
Shuningdek, Toshkentda firibgarlikda ayblanib advokat va yurist ushlangan edi.
O‘zbekistonda 2024-yilda jami 6898 nafar shaxs tomonidan 5716 ta korrupsiyaga oid jinoyat sodir etilgan. Jamoatchilik muhokamasiga qo‘yilgan 2025-yilga mo‘ljallangan davlat dasturi loyihasida rahbarlik lavozimidagi 500 kishining korrupsiyaga moyilligini baholash rejalashtirilgan.
Izoh (0)