Buxoro viloyatida pul evaziga auksion orqali yer ajratib berishni va’da qilgan hokim yordamchisi va tuman hokimligi xodimi qo‘lga olindi. Bu haqda “Zamon” informatsion dasturida ma’lum qilindi.
Qayd etilishicha, Buxoro viloyati IIB boshlig‘iga ariza bilan murojaat qilgan fuqaro Kogon tumani “Nurafshon” mahallasining hokim yordamchisi o‘zining tanishi orqali hokimlik balansida bo‘lgan zaxira yerlaridan jami 40 gektar yer maydonini elektron auksion orqali 500 million so‘mga sotib olib berishini aytib, evaziga 10 ming AQSH dollari talab qilgan.
Arizaga asosan Buxoro viloyati IIB Tergov-qidiruv xizmati JQB Korrupsiya va iqtisodiy jinoyatlarga qarshi kurashish bo‘limi xodimlari tomonidan tezkor tadbir o‘tkazilgan. Tadbirda hokim yordamchisi va uning tanishi Buxoro shahridagi savdo do‘konida ariza muallifidan talab qilgan puldan 5 ming dollarni olayotganida ushlangan.
Shundan so‘ng, ularning bergan ko‘rsatmasiga asosan tezkor tadbir davom ettirilib, Buxoro tumani “Rabotaqal’a” mahallasida Kogon tumani hokimligi qishloq xo‘jaligi bo‘limida ishlovchi shaxs 5 ming dollarni olganda ashyoviy dalillar bilan qo‘lga olingan.
Hozirda holat yuzasidan tergovga qadar tekshiruv harakatlari olib borilmoqda.
Pora bilan qo‘lga tushgan hokim yordamchilari
May oxirlarida Navoiy viloyatining Xatirchi tumanida hokim yordamchisi pora olayotganida ushlangandi. Fuqaro 25 million so‘m kredit olish va tadbirkorlikni boshlash maqsadida mahallaning hokim yordamchisiga uchrashgan. Ammo hokim yordamchisi unga tavsiyanoma tekinga berilmasligini aytgan. Biroq u fuqaroga “yordam berish” uchun 100 dollar va 900 ming so‘m olayotganida qo‘lga tushgan.
Aprel oyida esa Qashqadaryoning Yakkabog‘ va Shahrisabz tumanlarida ikki nafar hokim yordamchisiga jinoyat ishi qo‘zg‘atilgandi. Ulardan biri 1,7 milliard so‘mlik imtiyozli kredit mablag‘larini talon-toroj qilgan bo‘lsa, boshqasi yer bilan bog‘liq noqonuniy ishga aralashgan.
Izoh (0)