Toshkent shahrining Chilonzor tumani elektr tarmoqlar korxonasi 2 nafar xodimi 10 ming dollar pora olgan vaqtda ushlandi. Bu haqda poytaxt IIBB matbuot xizmati xabar berdi.
Maʼlum qilinishicha, xodimlar elektromobillarni quvvatlash uskunasini o‘rnatish uchun ruxsatnoma olib berish evaziga 15 ming dollar talab qilgan. O‘tkazilgan tezkor tadbirda ushbu xodimlar fuqarodan so‘ralgan pulning 10 ming dollarini olayotganda qo‘lga olindi.
“Oilaliman, uch nafar farzandim bor. Oldimga bir yigit kelib, elektromobillar uchun transformator punkti o‘rnatishga yordam so‘radi. Yordam berish maqsadida yo‘l-yo‘rig‘ini tushuntirdim. 10 ming dollar olib keldi. O‘sha vaqtda ushlandim. Pushaymonman qilgan ishimdan”, deydi gumonlanuvchi.
Gumonlanuvchilardan biri tuman elektr tarmoqlar korxonasida bosh muhandis, yana biri elektr ustasi bo‘lib ishlagan.
“Transformator punktini olib kelib, o‘rnatib berishni so‘radi. Bu narsa qo‘limizdan kelishi yo kelmasligini so‘radi. Biz unga ha deb, 15 ming dollarga kelishdik. Transformatorni bozordan olib kelish narxi 6 ming dollar bo‘ladi dedik. Uning loyiha ishlari 9 ming dollarga boradi deb aytgandik”, deydi yana bir gumonlanuvchi shaxs.
To‘plangan hujjatlar qonuniy qaror qabul qilish uchun prokuratura organlariga yuborildi.
So‘nggi oylarda e’lon qilingan firibgarlik va korrupsiya holatlari
Mart oyida Toshkent shahri va viloyatida fuqarolarni ishga kiritib qo‘yish uchun pul olgan Milliy gvardiya xodimlari qamoqqa olindi. Fevralda Toshkent shahrining Yashnobod, Navoiy shahri hamda Farg‘ona viloyatining Oltiariq tumanlarida fuqarolarga imtiyozli kredit olib berishni vaʼda qilgan shaxslar ushlandi. Xorazmda transport boshqarmasi bosh mutaxassisi 80 ming dollar olayotganida qo‘lga tushdi. Yanvarda Toshkentning Uchtepa tumanida hokim yordamchisi 30 ming dollari olayotganiga ushlandi.
Izoh (0)