Qashqadaryoda soliq idorasi mansabdori va yana bir kishiga jinoyat ishi qo‘zg‘atildi. Bu haqda DXX matbuot xizmati xabar berdi.
Qamashi tumanida yashovchi, 1981-yilda tug‘ilgan, muqaddam sudlangan shaxs 360 million so‘mlik soliq qarzdorligini to‘lamagani sababli Iqtisodiy sud tomonidan bankrot deb topilgan g‘isht ishlab chiqaruvchi MCHJning soliq qarzdorligini to‘liq to‘lamasdan, zavodga nisbatan qo‘yilgan taqiqni o‘zining mansabdor tanishlari orqali bekor qildirib, uning faoliyatini tiklab berish evaziga MCHJ rahbaridan 4000 dollar talab qilgan.
DXXning Qashqadaryo viloyati bo‘yicha boshqarmasi hamda Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda mazkur fuqaro oldindan 3000 dollar olgan vaqtida ushlangan.
Shuningdek, tezkor tadbir davom ettirilib, ushbu noqonuniy ishga aloqador bo‘lgan Qamashi tuman soliq inspeksiyasi boshlig‘i o‘rinbosari ham 3000 dollar olgan vaqtida ashyoviy dalillar bilan ushlangan.
Hozirda holat yuzasidan ikki qonunbuzarga nisbatan jinoyat ishi qo‘zg‘atilib, tergov harakatlari olib borilmoqda.
5-iyun kuni DXX Qoraqalpog‘istonda bog‘cha mudiraligi uchun 15 mln so‘m, bog‘ inspektorligiga esa 3 ming dollar talab qilgan rahbarlarni qo‘lga olgandi. 2-iyun kuni Farg‘onada bank mas’ullari va ikki hokim yordamchisiga jinoyat ishi qo‘zg‘atildi. May oyining oxirlarida Xorazmda O‘simliklar karantini va himoyasi bo‘limi boshlig‘i 10 ming dollar olayotganida ushlangandi.
14-maydan Davlat xavfsizlik xizmati vakolatlariga kiritilgan masalalar yuzasidan jismoniy va yuridik shaxslarning murojaatlarini tezkor ravishda qabul qilish maqsadida Call-markaz faoliyat yurita boshladi. Call-markazga 1520 qisqa raqami orqali qo‘ng‘iroq qilish mumkin. Murojaat qilgan fuqarolarning shaxsi sir saqlanishi kafolatlanadi.
Izoh (0)