Toshkent viloyatida yana 45 ta nuqtada mikro GES quriladi, deb xabar bermoqda viloyat hokimligi axborot xizmati.
Keltirilishicha, hokim qarori bilan 45 ta yangi mikro gidroelektr stansiya (GES) qurish uchun 3,23 gektar yer maydoni ajratildi. Mazkur qaror orqali mikro GESlar qurilishi uchun belgilangan joylar asosan tabiiy suv oqimlari, kanallar va irrigatsiya tizimlari bo‘ylab joylashgan. Bu esa katta mablag‘larsiz ham energiya ishlab chiqarish imkoniyatini yaratadi.
Mikro gidroelektr stansiyalar, katta masshtabda quriladigan GESlardan farqli ravishda, ayniqsa, qishloq joylarda elektr ta’minoti barqarorligini oshirish, yangi ish o‘rinlari yaratishga xizmat qiladi.
Jami 248 ta hududda ana shunday inshootlar qurilishi uchun yer maydonlari ajratilgan.
“Respublika hududlarida mikrogidroelektr stansiyalari tarmog‘ini rivojlantirish bo‘yicha qo‘shimcha chora-tadbirlar to‘g‘risida”gi prezident qarori qabul qilingan.
Qarorga ko‘ra, 2025–2026-yillarda mamlakat hududlarida mikrogidroelektr stansiyalari tarmog‘ini rivojlantirishning asosiy maqsadli ko‘rsatkichlari etib quyidagilar belgilandi, jumladan:
- jami quvvati 164 MVt bo‘lgan 2 983 ta mikro GES qurish va yiliga 500 mln kVt/soat ekologik toza elektr energiyasini ishlab chiqarish;
- yangi mikro GESlarni ishga tushirish hisobiga 280 mingta aholini elektr energiyasi bilan ta’minlash;
- qurilish davrida 1200 nafar ishchining bandligini ta’minlash va loyihalar ishga tushgandan keyin 520 ta doimiy ish o‘rni yaratish.
2025-yil 1-maygacha loyiha hujjatlariga asosan mikro GESlar qurish uchun tanlab olingan yer uchastkalari belgilangan tartibda Energetika vazirligiga ajratiladi. Energetika vazirligi ajratilgan yer uchastkalari loyiha tashabbuskorlariga mikro GESlar qurish va ishga tushirish uchun 20 yil muddatga ijaraga berilishini ta’minlaydi.
Izoh (0)