G‘uzor tumanida hokim yordamchisi 300 dollar pora bilan qo‘lga tushdi. Hokimlik holatni izohladi

Qashqadaryo viloyatining G‘uzor tumanida hokim yordamchisi 300 dollar pora bilan qo‘lga tushdi. Aytilishicha, u Qarshi tumanida yashovchi fuqaroni Respublika shoshilinch tibbiy yordam ilmiy markazi Qashqadaryo filialiga feldsher lavozimiga ishga kiritib qo‘yishni va’da qilib, evaziga undan 300 dollar pul olgan.

“Fuqaro E.F. muqaddam viloyat Bandlik boshqarmasida bo‘lim boshlig‘i lavozimida faoliyat ko‘rsatgan bo‘lib, 2022-yil 12-yanvardan boshlab ‘Jonbuloq’ mahallasida hokim yordamchisi lavozimida ish yuritib kelmoqda. Uning hokim yordamchisi lavozimiga ishga qabul qilinishida faoliyat ko‘rsatib kelgan ish joyidan ijobiy tavsiflanganligi ham e’tiborga olingan. 2022-yilning o‘tgan davri mobaynida hokim yordamchilari tomonidan yangi ish o‘rinlarini yaratish, aholi bandligini ta’minlash va xalqni rozi qilish yo‘lida bir qator ijobiy ishlar amalga oshirildi. Shuningdek, korrupsiya holatlarining oldini olish maqsadida hokim yordamchilari faoliyati tuman hokimligi, sektor rahbarlari hamda mahallabay ishlash va tadbirkorlikni rivojlantirish tuman markazi tomonidan doimiy nazorat qilib borildi. Bu borada uchrashuv va targ‘ibot ishlari o‘tkazilgan. Uchrashuvlar davomida hokim yordamchilaridan kafolat xatlari olinib, jarayonlar tegishli tartibda rasmiylashtirilgan.

Shunga qaramasdan, joriy yil 12-may kuni hokim yordamchisi E.F. o‘z vakolatiga kirmaydigan ish — Qarshi tumanida yashovchi fuqaroni Respublika shoshilinch tibbiy yordam ilmiy markazi Qashqadaryo filialiga feldsher lavozimiga ishga kiritib qo‘yishni va’da qilib, evaziga firibgarlik yo‘li bilan 300 dollarni olgan vaqtda jinoyat ustida qo‘lga olingan”, — deydi hokimlik mas’ullari pora haqidagi ma’lumotni tasdiqlar ekan.

Hokimlik, shuningdek, pora bilan qo‘lga tushgan hokim yordamchisi avvalgi ishidagi imkoniyatini hisobga olib pora olganini, ayni paytdagi lavozimi bunday vakolat bermasligini aytmoqda.

“Hokimlik E.F. tomonidan sodir etilgan firibgarlik jinoyatini oqlab bo‘lmasligini ta’kidlab, uning mazkur jinoiy harakati hokim yordamchisi faoliyatiga daxli yo‘qligini ma’lum qiladi”, — deyiladi hokimlikning rasmiy munosabatida.

Qashqadaryo viloyat prokuraturasi holat yuzasidan tergov-surishtiruv jarayonlari olib borilayotganini ma’lum qildi.