Yevropa davlatlari Rossiya bilan munosabatlarni tiklashi mumkin, biroq bu faqat Ukrainadagi urush tugaganidan so‘ng amalga oshadi. Bu haqda Chexiya prezidenti Petr Pavel BBC’ga bergan intervyusida ma’lum qildi.
U Rossiya prezidenti Vladimir Putin “abadiy hokimiyatda qolmasligi”ni aytib, Rossiya aholisi munosib hayot, erkin harakatlanish, ta’lim olish va xalqaro biznes yuritish imkoniyatlariga intilayotganini ta’kidladi.
Menimcha, rossiyaliklarning aksariyati izolyatsiyada va qattiq nazorat ostida yashayotganidan mamnun emas, dedi Pavel.
Prezidentning fikricha, “cheksiz urush” har ikki tomon — ham Ukraina, ham Rossiya uchun og‘ir insoniy yo‘qotishlarga olib kelmoqda. Bu esa Yevropa iqtisodiyotiga ham jiddiy zarar yetkazmoqda. Pavel, avvalo, Rossiyani muzokaralarga jalb qilish va o‘t ochishni to‘xtatishga erishish kerakligini aytdi. Shundan so‘ng tinchlik kelishuvi va Ukrainani qayta tiklash bo‘yicha muzokaralar o‘tkazish mumkin bo‘ladi. U Moskvaning pozitsiyasi hal qiluvchi omil bo‘lishini istisno etmadi.
Agar Rossiya konstruktiv muloqotga tayyor ekanini namoyon etsa, u Yevropa xavfsizligi bo‘yicha muzokaralar stoliga qaytishi, iqtisodiy hamkorlik masalalarini muhokama qilishi mumkin, dedi prezident.
Shu bilan birga, Pavel Ukrainadagi tinchlik har qanday keyingi qadamlarning asosiy va ajralmas sharti ekanini bildirdi. Rossiya bilan aloqalarni tiklash masalasi “insoniy adolat va xalqaro huquq asoslari nuqtayi nazaridan” juda og‘ir qabul qilinishini tan oldi. U, zarurat tug‘ilsa, Vladimir Putin bilan yuzma-yuz uchrashishga ham tayyorligini bildirdi.
Teng sherik sifatida munosabatda bo‘lish sharti bilan muzokaralarga qarshi emasman. Katta kichikka yoki kuchli kuchsizga nisbatan ustunlik pozitsiyasidan emas, balki bosimsiz munosabatda bo‘lish kerak. Afsuski, Rossiyaning hozirgi rahbariyati vaziyatni boshqacha idrok etmoqda — ular uchun “ikki tomon uchun ham manfaatli” tushunchasi yo‘q. Ular nazarida, yo g‘alaba qozonasan, yo mag‘lub bo‘lasan. Men esa g‘alaba ikki tomonlama bo‘lishi mumkinligiga ishonaman, dedi siyosatchi.
Uning fikricha, urush tugab, Yevropa xavfsizligi arxitekturasi barpo etilib, tomonlar o‘rtasidagi ishonch tiklangach, harbiy xarajatlarni kamaytirish va iqtisodiyotni mustahkamlash masalalariga ham e’tibor qaratish mumkin bo‘ladi.
Bu nafaqat Rossiya, balki Yevropa fuqarolari uchun ham foydali bo‘ladi. Ishonchim komilki, hamma tinchlikda yashashni istaydi. Hech kim Rossiyani nazorat qilishga urinayotgani yo‘q — bizning o‘z muammolarimiz yetarlicha, deya yakunladi Chexiya prezidenti.
Izoh (0)