Polsha Ukraina uchun o‘q-dorilar sotib olishga 50 million yevro ajratdi

Polsha Chexiyaning Ukraina uchun artilleriya o‘q-dorilarini sotib olish tashabbusiga o‘z hissasini qo‘shish uchun 50 million yevro ajratdi.

Bu haqda respublika Tashqi ishlar vazirligi rahbari Radoslav Sikorski Visegrad Insight jurnaliga bergan intervyusida ma’lum qildi.

“Biz Chexiyaning o‘q-dorilar sotib olish bo‘yicha tashabbusini yuqori baholaymiz, buning uchun biz 50 million yevro ajratdik”, dedi u. Chexiya prezidenti Petr Pavel 17-fevral kuni Myunxen xavfsizlik konferensiyasida so‘zga chiqib, agar mablag‘ topilsa, respublika uchinchi davlatlarda Ukraina Qurolli kuchlari uchun yuz minglab artilleriya snaryadlarini sotib olish imkoniyatini topganini aytgandi. Ammo bu qaysi davlat ekani ochiqlanmagan.

Aprel oyida Chexiya bosh vaziri Petr Fiala Chexiya tashabbusi doirasida Ukraina uchun 500 ming snaryad topilgani haqida xabar bergan edi. Ushbu o‘q-dorilarning 200 mingga yaqinini sotib olish bo‘yicha shartnomalar tuzilgan. Uning so‘zlariga ko‘ra, yaqin vaqt ichida qolgan 300 ming snaryadni sotib olish bo‘yicha shartnomalar imzolanadi. Hozirda 18 davlat tashabbusda ishtirok etmoqda.

Chexiya mudofaa vaziri Yana Cernochovaning aytishicha, may oyining oxiriga kelib, faqat Daniya, Kanada, Niderlandiya va Portugaliya tashabbus doirasidagi moliyaviy majburiyatlarini bajargan.