Islandiya parlamenti Ukrainani 2024—2028-yillarga mo‘ljallangan uzoq muddatli qo‘llab-quvvatlash bo‘yicha rezolyutsiya qabul qildi. Bu haqda Islandiya hukumati matbuot xizmati xabar berdi.
Islandiya tashqi ishlar vaziri Tourdis Gilfadouttir bu qarorni olqishlab, Ukrainani kuchli qo‘llab-quvvatlash Islandiya hamda Yevropa oldida turgan eng muhim xavfsizlik masalasi ekanini ta’kidlagan.
Xavfsizligimiz va turmush darajamiz asos qilib olingan xalqaro huquq tizimi Rossiyaning Ukrainaga shafqatsiz bostirib kirishi tufayli tahdid ostida. Shuning uchun biz Ukraina mudofaasiga qat’iy va aniq hissa qo‘shishimiz kerak, — degan islandiyalik vazir.
Uning so‘zlariga ko‘ra, mamlakat byudjetidagi ushbu rezolyutsiya asosida “Ukrainani maqsadli qo‘llab-quvvatlash uchun mustahkam poydevor yaratilgan.
Kiyevga uzoq muddatli yordam Ukrainada mustaqillik, suverenitet, chegaralar, fuqarolar xavfsizligi, gumanitar yordam va qayta qurish ishlarini qo‘llab-quvvatlashga qaratilgan bo‘ladi, — deyiladi press-relizda.
Ukraina prezidenti Vladimir Zelenskiy Islandiya hukumatiga ko‘rsatgan yordami uchun minnatdorlik bildirgan.
Islandiya Ukrainaning ishonchli do‘sti, hamkori va ittifoqchisidir. Biz Islandiyaning Rossiyaga qarshi kurashda ko‘rsatgan qudratli va keng qamrovli siyosiy hamda moliyaviy yordamini yuksak qadrlaymiz, — deb yozgan Zelenskiy X ijtimoiy tarmog‘ida.
Mart oyi oxirida Islandiya hukumati Chexiya tashabbusi doirasida Ukrainaga o‘q-dorilar xarid qilish uchun 2 million yevroga yaqin mablag‘ ajratishini ma’lum qilgan edi.
Izoh (0)