Ukraina prezidenti Vladimir Zelenskiy urush boshlanganidan so‘ng ko‘chib ketgan ukrainalik erkaklarni qaytarishda G‘arb yetakchilaridan yordam so‘radi. Bu haqda Bloomberg xabar berdi.
Ma’lumotlarga ko‘ra, Zelenskiy bu masalani ikki tomonlama uchrashuvlar doirasida ittifoqchilar bilan muhokama qilgan. Biroq “Polshadan Vengriyagacha” bo‘lgan davlatlarning siyosatchilari urush davom etar ekan, ukrainalik qochqinlarni vataniga majburan qaytarmasliklarini bildirgan.
“Ukrainalik qochqinlarni qabul qilayotgan mamlakatlar yangi ishchilardan iqtisodiy foyda olmoqda”, deb ta’kidlaydi Bloomberg.
Ushbu davlatlardagi ko‘plab kompaniyalarda, masalan, yaqinda qurilgan avtomobil yoki akkumulyator ishlab chiqarish zavodlari uchun xodimlar yetishmaydi.
- BMTning Qochoqlar bo‘yicha oliy komissari boshqarmasi ma’lumotlariga ko‘ra, Rossiyaning keng ko‘lamli bosqini boshlanganidan beri 17 millionga yaqin ukrainalik — urushdan oldingi aholining uchdan bir qismidan ko‘prog‘i o‘z uylarini tark etgan. Olti milliondan ortiq Ukraina fuqarosi xorijda qochoq bo‘lib qolmoqda.
Xususan, urushdan oldin ham ukrainaliklar istiqomat qilgan Polsha Ukrainadan 950 mingdan ziyod qochqinlarni qabul qildi. Bunda ularning 2023-yilda mamlakat yalpi ichki mahsulotiga qo‘shgan hissasi 0,7-1,1% atrofida baholanmoqda.
Bundan tashqari, Polshadagi ukrainalik qochqinlar asosan o‘zlarini o‘zlari ta’minlaydi: daromadlarining 80 foizi mamlakatda topgan ishlaridan keladi. Chexiyada esa ukrainalik qochqinlar 2024-yilning birinchi choragida ijtimoiy yordam sifatida olgan mablag‘laridan deyarli ikki barobar ko‘p soliq to‘lagan.
To‘g‘risini aytganda, ko‘plab Chexiya kompaniyalari ukrainalik qochqinlarning malakasi va mehnatiga tayanadi. Misol uchun, qurilish sohasi ukrainalik ishchilar bo‘lmasa butunlay to‘xtab qolgan bo‘lardi, deya izoh berdi Chexiya chakana savdo va mehmondo‘stlik sanoatining bosh lobbi guruhi rahbari Tomash Prousa.
Izoh (0)