Litvadan Interpol kanallari orqali qidirilayotgan shaxs O‘zbekistonga ekstraditsiya qilindi. Bu haqda IIV xabar berdi.
Interpol Toshkent MMB xodimlari kuzatuvida Litvadan O‘zbekistonga Jinoyat kodeksining 168-moddasida ko‘zda tutilgan firibgarlikni sodir etganlikda ayblanayotgan fuqaro ekstraditsiya qilindi. Taqdim etilgan hujjatlar asosida O‘zbekiston fuqarosi xalqaro qidiruvga berilgani e’lon qilindi.
Interpol kanallari orqali qidiruvdagi shaxsning Litva hududida ekani aniqlandi. U o‘sha yerda qo‘lga olinib, ekstraditsiya tekshiruvi uchun qamoqqa olingan.
O‘zbekiston Bosh prokuraturasining iltimosnomasini qanoatlantirgandan so‘ng, Litva tomoni jinoyatchini ekstraditsiya qilish va uni sodir etgan jinoyati uchun jazo tayinlash maqsadida topshirish to‘g‘risida qaror qabul qildi.
Toshkentdagi Islom Karimov nomidagi Xalqaro aeroportda qidiruvda bo‘lgan shaxs Interpol Milliy Markaziy Byurosining O‘zbekistondagi vakillari tomonidan respublika huquqni muhofaza qiluvchi organ xodimlariga topshirildi.
Qayd etilishicha, bu Interpol Toshkent va Vilnyus Milliy markaziy byurolari o‘rtasida ekstraditsiya jarayonini amalga oshirish bo‘yicha o‘zaro hamkorlikning ilk tajribasi bo‘lib, u mamlakatlarning xalqaro jinoyatchilikka qarshi kurashishdagi hamkorligini yanada kengaytirish va mustahkamlash imkoniyatini yaratadi.
Sankt Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
3-iyulda esa Ummondan O‘zbekiston Jinoyat kodeksining 135-moddasida nazarda tutilgan odam savdosida ayblanayotgan fuqaro ekstraditsiya qilingan.
Izoh (0)