Литвадан Интерпол каналлари орқали қидирилаётган шахс Ўзбекистонга экстрадиция қилинди. Бу ҳақда ИИВ хабар берди.
Интерпол Тошкент ММБ ходимлари кузатувида Литвадан Ўзбекистонга Жиноят кодексининг 168-моддасида кўзда тутилган фирибгарликни содир этганликда айбланаётган фуқаро экстрадиция қилинди. Тақдим этилган ҳужжатлар асосида Ўзбекистон фуқароси халқаро қидирувга берилгани эълон қилинди.
Интерпол каналлари орқали қидирувдаги шахснинг Литва ҳудудида экани аниқланди. У ўша ерда қўлга олиниб, экстрадиция текшируви учун қамоққа олинган.
Ўзбекистон Бош прокуратурасининг илтимосномасини қаноатлантиргандан сўнг, Литва томони жиноятчини экстрадиция қилиш ва уни содир этган жинояти учун жазо тайинлаш мақсадида топшириш тўғрисида қарор қабул қилди.
Тошкентдаги Ислом Каримов номидаги Халқаро аэропортда қидирувда бўлган шахс Интерпол Миллий Марказий Бюросининг Ўзбекистондаги вакиллари томонидан республика ҳуқуқни муҳофаза қилувчи орган ходимларига топширилди.
Қайд этилишича, бу Интерпол Тошкент ва Вильнюс Миллий марказий бюролари ўртасида экстрадиция жараёнини амалга ошириш бўйича ўзаро ҳамкорликнинг илк тажрибаси бўлиб, у мамлакатларнинг халқаро жиноятчиликка қарши курашишдаги ҳамкорлигини янада кенгайтириш ва мустаҳкамлаш имкониятини яратади.
Санкт Петербургда 2021 йилда содир этилган қотиллик учун қидирувда бўлган Ўзбекистон фуқароси 28 май куни Салвадордан экстрадиция қилинганди. Ўзбекистонда 9 миллион долларни талон-торож қилишда айбланган шахс Россияда ушланиб, 15 майда Ўзбекистонга экстрадиция қилинганди. Шунингдек, Ўзбекистон Интерпол Миллий марказий бюроси халқаро қидирувда бўлган жиноятчи аёлни БААдан чиқариб юборганди.
3 июлда эса Уммондан Ўзбекистон Жиноят кодексининг 135-моддасида назарда тутилган одам савдосида айбланаётган фуқаро экстрадиция қилинган.
Изоҳ (0)