“Formula-1” Bred Pittning butun karyerasidagi eng ko‘p daromad keltirgan filmga aylandi. U besh hafta ichida 545,6 million dollar yig‘di.
Bungacha Pittning eng kassabop filmi 2013-yilda chiqqan “Z dunyo urushi” bo‘lib, u 12 yil davomida umumiy 540 million dollar daromad keltirgan edi.
“Formula-1” real voqealarga asoslangan drama va sport janridagi film. Bunda avtomobil poygalari, sportdagi raqobat, shuningdek, hayotdagi qiyinchiliklar va shaxsiy kurashlar asosiy mavzu qilib olingan.
Filmda Bred Pitt asosiy qahramon — taniqli Formula-1 jamoasi rahbari rolini ijro etadi. U o‘z jamoasini qiyin paytlarda boshqaradi, katta bosim va raqobatga qarshi kurashadi. Filmda poyga sahnalari bilan birga sport olamining ichki sir va murakkabliklari, shuningdek, insoniy munosabatlar ham yaxshi aks ettirilgan.
“Formula-1” Apple TV+ platformasining ham eng ko‘p daromad olgan filmi bo‘ldi. Film yig‘gan mablag‘ Ridli Skottning “Napoleon” (221 million dollar) va Martin Skorsezening “Gulli Oy qotillari” (158 million dollar) filmi daromadlaridan deyarli ikki baravar ko‘p bo‘ldi.
Apple kino muvaffaqiyati tufayli filmning davomini suratga olishni rejalashtirmoqda. Variety nashrining xabar berishicha, film rejissyori Jozef Kosinski allaqachon keyingi qismni yaratish g‘oyasini ilgari surgan, unda Pitt bilan birga ekranda Tom Kruz ham paydo bo‘ladi.
Izoh (0)