Germaniyaning “Fortuna Dyusseldorf” klubi isroillik hujumchi Shon Vaysmanni o‘z tarkibiga qo‘shib olmoqchi edi. Biroq futbolchining G‘azo sektori bo‘yicha ijtimoiy tarmoqlarda bildirgan fikrlari sabab transfer amalga oshmay qolishi mumkin. Bu haqda Germaniyaning Bild nashri xabar berdi.
Manbaga ko‘ra, Vaysman 3-avgust kuni klub uchun tibbiy ko‘rikdan o‘tishi kerak edi. Ammo 2023-yil 7-oktabr kuni HAMAS hujumidan so‘ng futbolchi tomonidan yozilgan izohlar jamoatchilik e’tiboriga tushdi. Vaysman bu postlarni keyinchalik o‘chirib tashlagan hamda ularni hissiyot ta’sirida yozganini tan olib, qilgan ishidan afsusdaligini bildirgan.
Vaysman ijtimoiy tarmoqlarda “G‘azoni yer yuzidan yo‘q qilish kerak” degan chaqiriq postiga layk bosgan. Shuningdek, “nega hanuz G‘azoga 200 tonna bomba tashlanmadi?” degan jumla ostiga izoh qoldirgan. Qolaversa, bunga o‘xshash boshqa postlar ham futbolchi tomonidan qo‘llab-quvvatlangani qayd etilgan.
Ushbu harakatlar Germaniyadagi Falastin faollari va oddiy futbol ishqibozlarining jiddiy noroziligiga sabab bo‘ldi. Ijtimoiy tarmoqlarda Vaysman transferiga qarshi petitsiyalar e’lon qilinib, klub rahbariyatiga bosim kuchaymoqda.
Yuzaga kelgan vaziyatga izoh bergan Vaysman quyidagilarni ta’kidladi:
Men 7-oktabr voqealaridan hanuz motam tutayotgan xalq vakiliman. Tanqidni to‘g‘ri qabul qilaman, biroq holatga bir tomonlama baho berilayotganidan afsusdaman. Inson, isroillik va sportchi sifatida men ikki tomonda ham begunoh insonlarga ziyon yetishiga qarshiman Ammo “layklar” va izoh sabab mendan nafratlanishingiz adolatdan emas.
Ma’lumot uchun, 29 yoshli Shon Vaysman o‘tgan mavsum Ispaniyaning “Valyadolid” klubida o‘ynagan. Futbolchi ushbu jamoa safida jami 31 ta o‘yinda maydonga tushib, o‘z hisobiga 4 ta gol va 2 ta golli uzatma yozdirib qo‘ygan. Transfermarkt portali Shonning qiymatini 1,2 million yevroga baholamoqda.
Izoh (0)