Yaponiya o‘zining “Mogami” sinfidagi stels (yashirin) fregatini sotishga doir tarixiy kelishuvni imzoladi. Unga ko‘ra, Avstraliya armiyasi ushbu turdagi 11 dona kema bilan ta’minlanadi. Bu yaponlarning Ikkinchi jahon urushidan keyingi ilk harbiy kema eksporti bo‘ladi. Bu haqda Business Insider xabar berdi.
Avstraliya hukumati 6-avgust kuni Mitsubishi Heavy Industries tomonidan ishlab chiqarilgan 5 500 tonnalik 11 ta “Mogami” kemasini sotib olishini e’lon qilgan. Bitim qiymati 6,5 milliard dollar bo‘lib, 3 ta kema Yaponiyada, qolgan 8 tasi esa Avstraliya g‘arbiy portlaridan birida quriladi.
Avstraliya mudofaa vaziri Richard Marles bu kelishuvni “Yaponiya va Avstraliya o‘rtasidagi eng yirik mudofaa sanoati bitimi” sifatida baholamoqda. “Mogami” fregatlari Avstraliyaning 30 yillik xizmat muddatini o‘tab bo‘lgan Anzak sinfidagi kemalarning o‘rnini bosadi. Yangi turdagi kemalar 2034-yilda tayyor bo‘ladigan mahalliy Hunter sinfidagi og‘ir fregatlar kelguncha oraliq dastur sifatida xizmat qiladi.
Ta’kidlanishicha, ushbu eksport Yaponiyaning qurol-yarog‘ savdosida katta yutuq bo‘ladi. Tokio Ikkinchi jahon urushidan keyin urushdan voz kechish siyosati doirasida qurol eksportiga qat’iy taqiq qo‘ygan edi. 2014-yilda sobiq bosh vazir Sindzo Abe bu cheklovni qisman yumshatgan. 2023-yilda esa ushbu siyosatga o‘zgartirish kiritilib, ittifoqchi davlatlarga harbiy qurollarini sotishga ruxsat berilgan.
“Mogami” fregatlari 2019-yildan boshlab ishlab chiqariladi. 2022-yildan boshlab esa Yaponiyada bu turdagi bir nechta kemadan foydalanish boshlangan. Ular Type 17 kemaga qarshi raketalar, 16 hujayrali vertikal uchirish tizimi, og‘ir pulemyotlar, torpedo apparatlari va 127 millimetrli asosiy to‘p bilan jihozlangan. Uning orqa qismida vertolyot va dronlar uchun maydoncha ham mavjud.
Kemadagi ko‘plab funksiyalar, jumladan, navigatsiya va qurol boshqaruvi avtomatlashtirilgan, bu esa atigi 90 kishilik ekipaj bilan uni boshqarishga imkon beradi (xuddi shu o‘lchamdagi boshqa kemalarda 200 kishi talab etiladi).
Yaponiya va Avstraliya so‘nggi yillarda, ayniqsa Xitoy qudratining ortishi fonida, harbiy hamkorlikni kuchaytirib kelmoqda. Ular AQSH va Hindiston bilan birga “Kvartet” guruhiga a’zo bo‘lib, Hind—Tinch okeani mintaqasida Pekinga qarshi muvozanat yaratishni maqsad qilgan.
Izoh (0)