“Urushni to‘xtating”. Putin safarbarlik e’lon qilganidan keyin Xitoy Rossiya va Ukrainani o‘t ochishni to‘xtatishga chaqirdi

Rossiya prezidenti Vladimir Putin qisman safarbarlik e’lon qilib, mudofaa vaziri Sergey Shoygu 300 ming odam urushga chaqirilishini ma’lum qilgach, Pekin Rossiya va Ukrainani o‘t ochishni to‘xtatishga chaqirdi. Bu haqda Al Jazeera xabar bermoqda.

Xitoy Tashqi ishlar vazirligi matbuot kotibi Van Venbin Rossiya-Ukraina nizosi faqat tinch yo‘l bilan tartibga solinishi kerakligini aytib, o‘t ochishni to‘xtatishga da’vat etdi.

Uning ta’kidlashicha, Xitoy davlatlar suvereniteti va hududiy yaxlitligini hurmat qilish tamoyilini qo‘llab-quvvatlaydi va barcha mamlakatlarning xavfsizlik sohasidagi ehtiyojlarini hisobga olishga chaqiradi.

15-sentabr kuni Rossiya prezidenti Vladimir Putin va Xitoy Xalq Respublikasi (XXR) raisi Si Szinpin Samarqandda Shanxay hamkorlik tashkiloti (SHHT) sammiti doirasida uchrashgan, Uchrashuv boshida Putin Xitoy vakillariga “Ukraina inqirozi” bo‘yicha masalalarni ochiqlashga va’da bergan edi.

“RBK” ma’lumotlariga ko‘ra, mart oyida The Wall Street Journal, The New York Times va Financial Times o‘z manbalariga tayanib, Rossiya Xitoydan harbiy uskunalar va boshqa yordamlar taqdim etishni so‘ragani haqida xabar bergan. Ammo Rossiya va Xitoy bu axborotni rad etgan. AQSH prezidenti Jo Baydenning aytishicha, ayni paytda Pekin Moskvaga harbiy ko‘mak berayotgani bo‘yicha hech qanday dalillar yo‘q.

21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.

Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi.

Fransiya prezidenti Emmanuel Makron BMT Bosh assambleyasidagi nutqida Rossiya prezidenti Vladimir Putinning qisman safarbarlik borasidagi 21-sentabrda chiqarilgan farmonini qoraladi. “Urushni to‘xtatish uchun hamma Putinga maksimal bosim o‘tkazishi kerak. Uning safarbarlik qarori xato, bu rus xalqi uchun yomon yangilik bo‘ldi”, — dedi u.

AQSH prezidenti Jo Bayden esa Rossiya “BMT nizomining asosiy tamoyillarini uyalmasdan buzgani”ni ta’kidladi.