Rossiyaning Sankt Peterburg shahridagi tarixiy markazda o‘yinchoq to‘pponcha bilan raqs tushgan O‘zbekiston fuqarosiga sud hukmi o‘qildi. Bu haqda “RIA Novosti” xabar berdi.
O‘zbekistonlik yigit besh oyga koloniyada jazo o‘tashga hukm qilingan. Biroq u tergov izolyatorida saqlangan vaqti inobatga olinib, jazoni to‘liq o‘tab bo‘lgan deb hisoblangan.
19 yoshli Javohir Sagdullayev mart oyida “Galereya” savdo markazida qo‘lga olingandi. Unga nisbatan bezorilik moddasi bo‘yicha jinoyat ishi qo‘zg‘atilgandi.
Taʼkidlanishicha, O‘zbekiston fuqarosi raqs jarayonida “ataylab o‘yinchoq to‘pponchani namoyish etgan”. Bu atrofdagilarga ruhiy ta’sir ko‘rsatish va jamoat tartibini qo‘pol ravishda buzish sifatida baholangan. Sagdullayev aybiga iqror ekanini maʼlum qilgan.
Sud Sagdullayevning harakatlarini Rossiya Jinoyat kodeksining 213-moddasi 1-qismi “a” bandi bilan kvalifikatsiya qildi va umumiy rejimdagi koloniyada besh oy muddatga ozodlikdan mahrum qilish jazosini tayinladi... Qamoqda saqlangan vaqti hisobga olinib, jazo o‘talgan deb hisoblanadi, deydi Smolninskiy rayon sudi matbuot xizmati.
Javohir Sagdullayev sud zalida qamoqdan ozod etilgan.
Izoh (0)