To‘qsoninchi yillarda “ko‘cha” deb atalgan jinoyatchilar guruhi kuchayib, to‘ylardagi artistlardan pul talab qilishar edi. Bu haqda xonanda Xurshid Rasulov “IntervyuTV” YouTube kanalida eʼlon qilingan suhbatda aytib o‘tdi.
Xurshid Rasulovning maʼlum qilishicha, u “ko‘cha”ning tazyig‘idan qochib, boshqa ish qilib ko‘rgan.
Rosa “ko‘cha” rivojlangan vaqtlar bo‘lgan. To‘ylarda sanʼatkorlarning pulini olib qo‘yishar edi. Biz pul bermasdik. Qanday qilib beraman? Og‘zimdagi nonni berib qo‘yamanmi? “Mana, sizga olib keting ko‘chavoy aka”, deb?! Tepangizga keladi-da, “Pul ber”, deydi. O‘sha vaqt bermaganman. Ulardan zerikdim. Qo‘shiqqa qo‘l siltab ketmagan bo‘lsam-da, boshqa ishlar ham qilib ko‘rdim, dedi xonanda.
Uning qo‘shimcha qilishicha, bir do‘sti bilan tadbirkorlik qilib ko‘rgan, lekin bankrotga uchragan.
Men senlar bilan olishib yotamanmi, dedim-da, bir og‘aynim bilan savdogarlik qilib ko‘rmoqchi bo‘ldim. Bir-ikki so‘m pulim bor edi, undan-bundan olib, Xitoyga borib keldik.
Sherigim tovarlarni yaxshi sotdi, ishlari yurishib ketdi. Men bankrot bo‘ldim, tovarlarni sotolmadim. O‘z narxiga berib, olgan pullarimni ega-egasiga tarqatib, hammasini joyiga qo‘ydim-da, qo‘shig‘imni aytib ketaverdim, dedi Xurshid Rasulov.
Avvalroq Xurshid Rasulov “O‘zimdan kichkina bolalarning qo‘lida o‘qiymanmi? Bu ko‘zbo‘yamachilik-ku”, deb oliy taʼlimda o‘qishni istamaganini aytib o‘tgan edi.
Izoh (0)