Xurshid Rasulovning yangi konsert dasturidan reportaj (video)

Xurshid Rasulov — o‘zbek san’atida o‘z o‘rni va yo‘nalishiga ega ijodkor hisoblanadi. San’atkor 30 yillik faoliyati davomida faqat jonli ijroda kuylashi bilan xalq e’tiboriga tushgan. “Daryo” Xurshid rasulovning yangi konsert dasturidan reportaj tayyorladi.

Xonandaning uch kunlik konserti ham to‘liq jonli ijroda o‘tkazildi. Dasturda muxlislarga manzur qo‘shiqlar bilan birga yangi taronalar ham kuylandi.

— Konsertga yillab tayyorgarlik ko‘rish mumkin. Repitisiya jarayonlari ikki oy davomida o‘tkaziladi. Jonli ijroda konsert berish uchun bir-ikki yil tayyorgarlik ko‘rishi kerak. O‘shandagina konsert ko‘ngildagidek bo‘ladi, — deydi xonanda.

Shou-biznes vakillarining ko‘pchiligi jonli ijroda konsert berish uchun ovoz kamida uch kun dam olishi kerak, deb hisoblashadi. Xurshid Rasulov bu gaplar shunchaki bahonaligi, shamollagan paytda ham jonli kuylashga majbur bo‘lgani haqida gapirdi.

— Menimcha, bu gaplar shunchaki bahona. Konsert kuni ham ovozimda ozgina shamollash bor. Lekin baribir ishlashga majburman. Chunki shuncha muxlis to‘plangan, ularni bahona bilan ranjitib qo‘yolmayman. Jonli ijrodagi konsert berishning zamirida katta mehnat yotadi. Buni “katta” san’atkorlar juda yaxshi bilishadi. Ikki-uch oy ovoz ustida tinimsiz ishlansa, jonli ijroda konsert bersa bo‘ladi. Muhimi mehnatdan qochmaslik kerak, — deydi xonanda.

Jonli ijroda kuylaydigan xonandada ovozidagi muammolar sabab to‘y-xizmatlarini rad etgan paytlari bo‘lganmi? Bu savolga Xurshid Rasulov quyidagicha javob berdi.

— Unday vaziyatlar bo‘lmagan. Ovozim bo‘g‘ilgan paytlar ham bor. Lekin xizmatni o‘tkazishga harakat qilaman. Chunki o‘sha inson yaxshi kunida birga bo‘lishimizni niyat qilgan bo‘ladi. Uning quvonchini buzishga haddim sig‘maydi, — deydi xonanda. 

Xurshid Rasulov o‘g‘lidan boshqa xonandalar bilan duet kuylamasligining sababini quyidagicha izohladi. 

— O‘g‘lim bilan ham duet kuylaganim yo‘q. Ba’zida sahnada ko‘maklashish uchungina men bilan birga chiqadi. Duet kuylash ko‘ngil bilan bog‘liq holat. Agar ikki xonandaning ko‘ngli bir-biriga yaqin bo‘lmasa birga kuylolmaydi. Men istagan xonanda men bilan duet kuylashni istamasligi mumkin. Duet aytishni xohlaganlarni ham rad etgan paytlarim ko‘p bo‘lgan, — deydi xonanda.

Konsertda qiziqchi Avaz Oxun ham ishtirok etdi. 

— Xonandaning ijodidan kelib chiqqan holda repertuar tanlashga harakat qildim. Xurshid Rasulovning ijodini ancha yildan beri kuzataman. Ayni sevdim-kuydim mavzudagi qo‘shiqlari ommalashgan paytida biz ham shunday tuyg‘ularni boshdan kechirayotgandik, — deydi so‘z ustasi.
Bundan tashqari, Avaz Oxun bu yil o‘ninchi yakkaxon konsert dasturiga tayyorgarlik ko‘rayotganini ham ma’lum qildi. 

Dasturga Feruza Bonu boshlovchilik qildi.

— Ko‘pchilik muxlislar qatori Xurshid Rasulovning “Yoshlik bizni tashlab ketadi” qo‘shig‘ini sevib tinglayman. Bu insonni nafaqat ijodkor, balki yaxshi inson bo‘lgani uchun ham hurmat qilaman. Qo‘shiqlarida o‘ziga xos shijoat va mardlik bor, — deydi Feruza Bonu.

Konsertga nafaqat o‘zbekistonlik, balki qo‘shni respublikalarda yashovchi muxlislar ham tashrif buyurishgan. Ular orasida 20 yildan buyon xonandaning ijodini kuzatadiganlari ham bor.