Xurshid Rasulov rossiyalik boshlovchi Andrey Malaxov e’tiboriga tushgani hamda “Privet, Andrey!” ko‘rsatuviga taklif etilgani haqida (video)

O‘zbekistonda xizmat ko‘rsatgan artist Xurshid Rasulov MY5 telekanalining “Omon—Omon” ko‘rsatuviga bergan intervyusida Rossiyaning taniqli teleboshlovchisi Andrey Malaxov nega uni shoshilinch Rossiyaga chaqirgani haqida so‘zlab berdi.

“Yaqinda bizni Rossiyaga, ‘Privet Andrey’ ko‘rsatuviga chaqirishdi. Rossiya xalq shoiri Robert Rojdestvenskiyning she’rini qo‘shiq qilib kuylagandim. Aslida bu qo‘shiqni boshqa inson, Gruziya xalq artisti Vahtang Kikabidze ijro etgan. Bu qo‘shiq ‘Moi goda, moyo bogatstvo’ deb nomlanadi, ‘Mimino’ filmini ko‘rganlar yaxshi biladi. Vahtang Kikabidze filmda rol ham ijro etgan. Qisqasi, shu qo‘shiq ma’qul keldi shekilli, o‘zlari iltimos qilishdi. Men bordim, ko‘rsatuvda qatnashdim. Bitta yaxshi tomoni bo‘ldiki, xursand bo‘ldim Rossiya xalq artistlari o‘tirib bu qo‘shiq seniki bo‘libdi, ijrosi yaxshi bo‘libdi deb aytishdi. Hattoki notalarini ham o‘zgartirganim yo‘q. Ko‘rsatuv Robert Rojdestvenskiy tavalludining 90 yilligi munosabati bilan suratga olindi, uning she’rlarini qo‘shiq qilgan MDH davlatlari xonandalari hammasi taklif qilindi. Vahtang Kikabidze keksayib qolgani uchun ko‘rsatuvga kela olmadi” —, deydi Xurshid Rasulov.