Тўқсонинчи йилларда “кўча” деб аталган жиноятчилар гуруҳи кучайиб, тўйлардаги артистлардан пул талаб қилишар эди. Бу ҳақда хонанда Хуршид Расулов “ИнтервьюTV” YouTube каналида эълон қилинган суҳбатда айтиб ўтди.
Хуршид Расуловнинг маълум қилишича, у “кўча”нинг тазйиғидан қочиб, бошқа иш қилиб кўрган.
Роса “кўча” ривожланган вақтлар бўлган. Тўйларда санъаткорларнинг пулини олиб қўйишар эди. Биз пул бермасдик. Қандай қилиб бераман? Оғзимдаги нонни бериб қўяманми? “Мана, сизга олиб кетинг кўчавой ака”, деб?! Тепангизга келади-да, “Пул бер”, дейди. Ўша вақт бермаганман. Улардан зерикдим. Қўшиққа қўл силтаб кетмаган бўлсам-да, бошқа ишлар ҳам қилиб кўрдим, деди хонанда.
Унинг қўшимча қилишича, бир дўсти билан тадбиркорлик қилиб кўрган, лекин банкротга учраган.
Мен сенлар билан олишиб ётаманми, дедим-да, бир оғайним билан савдогарлик қилиб кўрмоқчи бўлдим. Бир-икки сўм пулим бор эди, ундан-бундан олиб, Хитойга бориб келдик.
Шеригим товарларни яхши сотди, ишлари юришиб кетди. Мен банкрот бўлдим, товарларни сотолмадим. Ўз нархига бериб, олган пулларимни эга-эгасига тарқатиб, ҳаммасини жойига қўйдим-да, қўшиғимни айтиб кетавердим, деди Хуршид Расулов.
Аввалроқ Хуршид Расулов “Ўзимдан кичкина болаларнинг қўлида ўқийманми? Бу кўзбўямачилик-ку”, деб олий таълимда ўқишни истамаганини айтиб ўтган эди.
Изоҳ (0)