“O‘zimdan kichkina bolalarning qo‘lida o‘qiymanmi? Bu ko‘zbo‘yamachilik-ku” — Xurshid Rasulov yangi konserti va oliy taʼlimda o‘qishni istamagani haqida gapirdi (foto, video)

Ayni kunlarda xonanda Xurshid Rasulov jonli ijrodagi yakkaxon konsert dasturini taqdim etmoqda. “Daryo” muxbiri Jahongir Murtazoyev konsertga tashrif buyurib, sahna orti jarayonlari haqida reportaj tayyorladi. Bundan tashqari, konsert oldi xonandadan ko‘pchilikni qiziqtirgan savollarga javob oldi.

— Bu yilgi konsert ham shov-shuvli bo‘lmasligi mumkin. Konsertimda so‘zning mag‘zini chaqadigan muxlislar tashrif buyuradi. Bu yilgi dasturda yoshlik haqida qo‘shiq aytmayman, degandim. Har gal aytmayman deyman-u, shoirlarning aybi bilan yana yoshlik haqida qo‘shiq kuylab qo‘yaman. Yaxshi sheʼr ham xuddi taomdek gap — yoqsa, har kuni ham o‘sha taomdan yeyishga tayyor bo‘lasiz.

Bu yilgi konsertga 27-yil avval ijro etgan qo‘shiqlarni ham kiritdik. Chunki o‘sha paytda u qo‘shiqlarga yetarlicha eʼtibor berilmagan. Ularni biror marta katta sahnada ijro etmaganim uchun albatta, bir kun “Xalqlar do‘stligi”da kuylayman, deb niyat qilgandim, — deydi Xurshid Rasulov.

Xonanda o‘zbek sanʼatida jonli ijrodagi konsertlarning soni ortgani va baʼzi qiyinchiliklar yuzaga kelgani haqida aytib o‘tdi.

— Kundan kunga jonli ijroga bo‘lgan eʼtibor kuchayyapti. 2006—2007-yillarda hech bir xonanda jonli ijroda konsert bermasdi. Bir-ikkita sanʼatkorlarning jonli konsert berganini aytmasa, qolganlarning bari fonogramma bilan konsertini o‘tkazardi. Televideniyeda ham jonli ijrodagi ko‘rsatuvlar ortgani uchun sozandalar ham yil sayin o‘syapti.

Ilgari jonli ijroda konsert beramiz, desak qatnashishni istovchi talabgor sozandalar ortib ketardi. Hozir esa sozandalarda iltimos qilyapmiz, jonli ijroda kuylaydigan xonandalar ko‘pligidan ularning vaqti bo‘lmayapti, — deydi Xurshid Rasulov.

Oliy taʼlimda tahsil olmagan xonanda agar imkon bo‘lganida qaysi oliygohda o‘qishni istashi haqida gapirdi.

— O‘zbekiston davlat konservatoriyasida o‘qigan bo‘lardim. Men tengilar ham o‘qishayotgani haqida eshitdim. Bir o‘qisammikan dedim, ammo u yerga borib nimani o‘rganaman deb o‘ylanib qoldim. Ko‘p tanishlarim o‘qishni tavsiya qildi, ammo endi o‘qiy olmayman deb rad etdim. O‘zimdan kichkina bolalarning qo‘lida o‘qiymanmi, ular meni ustoz deb yurishadi-ku, dedim. Bu ko‘zbo‘yamachilik bo‘ladi-da. Muxlislar mendan yaxshi qo‘shiqlarni kutishadi, ularni quvontirib yuraveraman, — deydi xonanda Xurshid Rasulov.

Agar konsertga borish imkoningiz bo‘lmagan bo‘lsa, undan tayyorlangan maxsus reportajni tomosha qilishingizni tavsiya qilamiz.