25-may kuni O‘zbekistondagi barcha maktablarda so‘nggi qo‘ng‘iroq jarang sochdi. Shu munosabat bilan beg‘ubor maktab damlarini yodga soluvchi qo‘shiqlar haqida so‘z yuritmoqchimiz.
“Xayr, maktabim”
2000-yili “Tarona Records” studiyasining asoschisi Ravshan Yo‘ldoshev bastakor Husan Sodiqovga maktab bitiruvchilariga bag‘ishlab qo‘shiq yaratish taklifini beradi. Xonanda Ravshan Sobirovning amakisi Husan Sodiqov o‘sha paytda jiyani bilan birga respublika bo‘ylab o‘tkazilayotgan gastrol safarlari bilan band edi. U ijodiy safar chog‘ida qo‘shiqning ilk variantini yaratadi. Uni yaratishda Ravshan Sobirovning safardagi sozandasi Odiljon Mahmudov sintezatorda dastlabki musiqiy bezakni chalib bergan. Husan Sodiqov musiqa professional bo‘lishi uchun uni “Bolalar” guruhi musiqiy bezakchisi Vagif Zokirovga yuborgan. U qisqa vaqtda gitara solasini qo‘shib, Husan Sodiqovga tayyor musiqani ko‘rsatgan. Qo‘shiq va klip ilk marta 2000-yilning 25-may kuni omma e’tiboriga havola etilgan.
“Ey sinfdosh”
Bundan roppa-rosa 32 yil avval “Ey sinfdosh” taronasini andijonlik bitiruvchi yigit ustozlari va sinfdosh do‘stlariga bag‘ishlab ijro etgan. Qo‘shiqning so‘zi va musiqasi ham ijrochining o‘ziga tegishli. Keyinchalik u Janob Mirzo taxallusi bilan ijod qilgan. Ammo “Ey sinfdosh” qo‘shig‘ini Janob Mirzodan so‘ng ko‘plab ijodkorlar ham qayta kuylagan.
“So‘nggi qo‘ng‘iroq”
Sirdaryolik xonanda Asatillo Xoliqov 1998-yili “So‘nggi qo‘ng‘iroq” nomli qo‘shiqni ijro etgan. U paytlarda ijtimoiy tarmoqlar rivojlanmagan bo‘lsa-da, qo‘shiq qisqa vaqtda omma e’tiboriga tushgan. Xonanda mazkur qo‘shiqning she’rini navoiylik shoir Murod Mengliboyevning kitobidan olgan. So‘ng bastakor Alisher Ikromovga musiqa bastalatgan. Qo‘shiq o‘sha yili o‘tkazilgan “O‘zbekiston — vatanim mani” qo‘shiqlar tanlovida g‘olib bo‘lgan.
Quyida san’at ixlosmandlari tomonidan yaxshi qarshi olingan maktab va sinfdoshlar mavzusidagi boshqa qo‘shiqlar ham keltiriladi.
Xurshid Rasulov “Sinfdosh”
Lola — “Maktab”
Shuhrat Daryo — “Sinfdosh qiz”
Jahongir Otajonov — “Sinfdosh qiz”
Hamdam Sobirov — “Maktabimda”
Otabek Mutalxo‘jayev — “Xayr, maktabim”
Nilufar Usmonova — “Maktab”
Izoh (0)