Rossiya Xavfsizlik kengashi raisi o‘rinbosari Dmitriy Medvedev AQSHning 22-iyun kuni Erondagi uchta yadroviy obyektga qilgani hujumiga munosabat bildirdi. U “tinchlikparvar Tramp yangi urush boshlagani”ni ta‘kidladi.
Medvedevga ko‘ra, aksariyat davlatlar AQSH va Isroilning harakatlariga qarshi. Hujum oqibatida Eron yadro obyekti deyarli shikastlanmagan yoki oz zarar ko‘rgan.
Yadro materiallarini boyitish, endi ochiq aytish mumkinki, kelajakda yadro qurollarini ishlab chiqarish ham davom ettiriladi. Bir qator mamlakatlar Eronga o‘zlarining yadroviy o‘q-dorilar to‘plamini to‘g‘ridan-to‘g‘ri yetkazib berishga tayyor, dedi u.
Medvedev Isroil hujum ostida ekani, portlashlar yangrab, odamlar vahimaga tushayotganiga e‘tibor qaratdi. Siyosatchi AQSH quruqlikdagi operatsiya ehtimoli bilan yangi mojaroga tortilganini ta‘kidladi.
Eron siyosiy tuzumi saqlanib qoldi, balki kuchaygan ham bo‘lishi mumkin. Xalq diniy rahnamo atrofida birlashmoqda, hatto ilgari uni yoqtirmaganlar ham, dedi Rossiya Xavfsizlik kengashi raisi o‘rinbosari.
U bunday “yutuqlar” bilan Tramp tinchlik bo‘yicha Nobel mukofotini ololmasligini qayd etdi.
Yaxshi boshlandi, tabriklayman, janob prezident!, deya xulosa qildi Dmitriy Medvedev.
AQSHning Eronga hujumi
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab 13 tonnalik GBU-57 bunkerga qarshi bombalarini tashladi.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Shu bilan birga, Oq uydagi yuqori martabali amaldorning The Wall Street Journal’ga ma’lum qilishicha, zarbalar Erondagi rejimni o‘zgartirishga qaratilmagan “bir martalik operatsiya” bo‘lgan.
Eron harbiylari AQSH hujumiga javoban Isroilga ballistik raketalar uchirdi va birinchi marta 2 ming kilometr masofaga uchadigan eng yangi Kheibar modelini qo‘lladi. Natijada Tel Aviv, Nes Sion va Hayfa shaharlarida bir nechta uylar vayron bo‘ldi, 86 kishi jarohatlandi, deya xabar berdi Sog‘liqni saqlash vazirligi. Isroil mudofaa armiyasi ma’lumotlariga ko‘ra, Eron jami 30 ga yaqin raketa uchirgan.
Eron tashqi ishlar vaziri Abbos Aroqchi Istanbulda turib matbuot anjumani o‘tkazgan. U mojaroga diplomatik yechim ko‘rmayotganini aytib, Putin bilan uchrashish uchun Moskvaga borishini ta’kidlagan. Aroqchi AQSH prezidenti “nafaqat Eronga, balki o‘z xalqiga ham” xiyonat qilganini aytgan.
Izoh (0)