“Daryo” nashri 22-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiya g’alabaga erishmasdan to‘xtay olmaydi, aks holda u parchalanishi mumkin.
Agar AQSH Rossiyani mag‘lub etmoqchi bo‘lsa, Moskva o‘zini har qanday qurol, jumladan, yadroviy qurol bilan himoya qilishga haqli, dedi Rossiya Federatsiyasi Xavfsizlik kengashi raisi o‘rinbosari Dmitriy Medvedev.
“Strategik hujum qurollarni qisqartirish bo‘yicha AQSH bilan shartnoma(“SNV-3”)ning to‘xtatilishi (hozircha) shu bilan bog‘liq. Haqiqatdan uzilgan AQSH elitasi nima qilib qo‘ygani haqida o‘ylashsin. Biz boshqa yadroviy kuchlar — NATO a’zolari: Fransiya va Britaniyaning ham munosabatini kuzatyapmiz. AQSH va SSSR (endilikda Rossiya) o‘rtasidagi kelishuvlarni tayyorlashda ularning strategik yadro kuchlari odatdagi yadro kallaklari va tashuvchilar balansiga kiritilmagan va buni qilish vaqti keldi”, — deb yozdi u Telegram-kanalida.
Medvedev Baydenning “Rossiya Ukrainaga hujumni to‘xtatsa, urush tugaydi, agar Ukraina Rossiyadan o‘zini himoya qilishni to‘xtatsa, Ukraina tamom bo‘ladi”, — degan so‘zlarini esladi va buni o‘z versiyasiga o‘girdi: “Agar Rossiya g‘alabaga erishmasdan ‘SNV-3’ni to‘xtatsa, Rossiya mavjud bo‘lmaydi, u parchalanadi. Agar AQSH Kiyev rejimiga qurol yetkazib berishni to‘xtatsa, urush tugaydi
Eslatib o'tamiz, Vladimir Putin Rossiyada 2024-yilda bo‘lib o‘tadigan prezidentlik saylovlarida qatnashish yoki qatnashmasligi haqida hozircha e'lon qilmadi.
21-fevral kuni Putin Federal Majlisga murojaat yo‘llar ekan, 2024-yilda bo‘lib o‘tadigan prezidentlik saylovlari qatʼiy qonunlarga muvofiq, barcha demokratik va konstitutsiyaviy tartiblarga rioya qilingan holda o‘tkazilishini aytdi.
Qonun bo‘yicha Putin 2024-yilda yangi prezidentlik muddati uchun nomzodini qo‘yish huquqiga ega.
Fransiya energetika giganti “Gazprom”ga qarshi sud ishini boshladi
Fransiyaning Engie energetika kompaniyasi uzoq muddatli shartnomalar bo‘yicha gaz yetkazib berish majburiyatlarini bajarilmaganligi sabab “Gazprom Eksport” kompaniyasiga qarshi arbitraj ishini boshladi. Bu haqda “Interfaks” xabar bermoqda.
Sud ishi 2022-yilning to‘rtinchi choragi boshida boshlangan. Engie shartnoma bo‘yicha jarimalarni to‘lashni va “Gazprom”ning kelishuvlarga rioya qilmasligi natijasida ko‘rilgan zararni qoplashni talab qilmoqda.
“Ushbu arbitraj protsedurasi 2022-yil iyun oyi o‘rtalarida “Gazprom Eksport”ning Engie kompaniyasiga yetkazib berishdagi sezilarli tanqislik bilan bog‘liq, shundan so‘ng 2022-yil yozi oxirida “Gazprom Eksport” tomonidan tomonlar o‘rtasidagi kelishmovchiliklar tufayli Engie’ga yetkazib berishni qisqartirish bo‘yicha bir tomonlama qaror qabul qilingan”, — deyiladi hujjatda.
Engie fransuz energetika sanoati guruhidir. Uning asosiy aksiyadori Fransiya davlati bo‘lib, u kapitalning 23,64 foiziga va ovoz berish huquqining 33,84 foiziga ega.
2022-yil 1-sentabrdan boshlab “Gazprom” iyul oyidagi yetkazib berish uchun to‘liq to‘lanmagani uchun Engie’ga gaz yetkazib berishni to‘xtatgandi.
O‘rta Yer dengizida cho‘kib ketgan mashxur kemaga O‘zbekistonning qanday aloqasi bor?
“Titanik” Shimoliy Atlantika okeanida cho‘kib ketishidan 2000 yil oldin O‘rta Yer dengizida Uluburun sharqiy qirg‘oqlarida ko‘plab nodir metallarni olib ketayotgan yana bir mashhur kema halokatga uchragan. Hodisa haqida ma’lum bo‘lgan 1982-yildan beri olimlar Uluburun kemasi halokatining tafsilotlarini o‘rganib keladi.
Yaqinda bir guruh olimlar, jumladan, St.Luisdagi Vashington universitetining sanʼat va fanlar bo‘yicha arxeologiya professori Maykl Frachetti hayratlanarli topilmani aniqladi: kemada topilgan qalayning taxminan uchdan bir qismini Markaziy Osiyoda hozirgi O‘zbekiston hududida yashagan tog‘ chorvadorlarining kichik jamoalari ishlab chiqargan va yetkazib bergan — O‘rta Yer dengizi bo‘ylab bozorlarga tashilgan qalaydan bronza metall hosil qilishda foydalanilgan.
30-noyabr kuni Science Advances jurnalida chop etilgan tadqiqot geokimyoviy tahlillardagi yutuqlar tufayli amalga oshirilgan, unda yuqori darajadagi aniqlik bilan tadqiqotchilar miloddan avvalgi davr kemasiga ortilgan qalayning bir qismi O‘zbekiston hududidagi Mushiston konidan, qolgan ikki qismi qadimgi Anatoliyadagi ya’ni hozirgi Turkiyadagi Kestel konidan qazib olinganini aniqladi.
O‘sha davrda O‘rta Osiyoning konchilik rayonlarida yirik sanoat markazi yoki imperiyadan uzoqda joylashgan tog‘ chorvadorlarining kichik jamoalari yashagan. Eron va Mesopotamiya orqali o‘tadigan ikki joy orasidagi relyef qo‘pol edi, bu esa tonnalab og‘ir metallarni o‘tkazishni juda qiyinlashtirardi.
“Aftidan, mahalliy konchilar keng xalqaro tarmoqlarga kirish imkoniga ega bo‘lgan va quruqlikdagi savdo va boshqa aloqa shakllari orqali mazkur juda muhim tovarni O‘rta Yer dengizigacha o‘tkazishga muvaffaq bo‘lgan”, — dedi Frachetti.
Korrupsiyaga qarshi o’tkazilgan expertiza qonun hujjatlaridagi korrupsion holatlarni aniqlay olmadimi?
O‘zbekistonda 2022-yilda ekspertizadan o‘tkazilgan qonunchilik hujjatlarining 243 tasida 350 ta korrupsiyaviy omil aniqlandi, deb xabar bermoqda Adliya vazirligi.
Qayd etilishicha, 2022-yil davomida ijtimoiy himoya, moliya va bank, tadbirkorlik, tashqi iqtisodiy faoliyat hamda bojxona ishiga oid 1 860 ta qonunchilik hujjati korrupsiyaga qarshi ekspertizadan o‘tkazilgan. Ekspertiza natijalariga ko‘ra, hujjatlarda 350 ta korrupsiyaviy omil aniqlangan.
Davlat organlari va tashkilotlari tomonidan 293 ta loyiha korrupsiyaga qarshi ekspertizadan o‘tkazilgan va ularda korrupsiyaviy omillar aniqlanmagani maʼlum qilingan. Lekin ushbu loyihalar Adliya vazirligi tomonidan ekspertizadan o‘tkazilganda ularda 457 ta korrupsiyaviy omil aniqlangan.
Ushbu holatdan kelib chiqib, “Korrupsiyadan xoli qonunchilik”ni yaratish maqsadida 2026-yilgacha amaldagi 21 mingga yaqin qonunchilik hujjatlari korrupsiyaga qarshi ekspertizadan o‘tkazilishi aytildi.
Izoh (0)