Hindiston bosh vaziri Narendra Modi may oyida 4 kun davom etgan mojarodan so‘ng Hindiston va Pokiston o‘rtasidagi o‘t ochishni to‘xtatish AQSH vositachiligida emas, balki ikki davlat o‘rtasidagi muzokaralar orqali amalga oshirilganini aniq aytdi. Bu haqda Al Jazeera xabar berdi.
“Narendra Modi prezident Trampga Hindiston va Pokiston o‘rtasida hech qanday AQSH vositachiligi bo‘lmaganini aniq aytdi. Harbiy harakatlarni to‘xtatish bo‘yicha muzokaralar bevosita Hindiston va Pokiston o‘rtasida harbiy aloqa orqali va Pokistonning talabi bilan bo‘lib o‘tdi. Bosh vazir Modi Hindiston ilgari vositachilikni qabul qilmaganini va hech qachon qabul qilmasligini ta’kidladi”, dedi Hindiston tashqi ishlar vaziri Vikram Misri.
Vazirning aytishicha, ikki yetakchi 17-iyun kuni kechqurun Trampning qat’iy talabi bilan telefon orqali suhbatlashgan. Sababi ikki rahbar G7 sammiti doirasida Kanadada uchrasha olmagan edi. Suhbat 35 daqiqa davom etgan.
Tramp may oyida Pokiston va Hindiston AQSH vositachiligidagi muzokaralardan so‘ng o‘t ochishni to‘xtatishga rozi bo‘lganini va urush o‘rniga savdoga e’tibor qaratishga chaqirganidan so‘ng harbiy harakatlar tugaganini aytgandi.
May oyida Pokiston tashqi ishlar vaziri Ishoq Dor Al Jazeera nashriga bergan intervyusida Vashington sulhga vositachilik qilgani haqidagi da’volarni rad etib, Islomobod mustaqil harakat qilishini ta’kidlagan edi.
Hindiston va Pokiston o‘rtasidagi mojaroga 22-aprel kuni Hindiston tomonidan boshqariladigan Kashmir shtatidagi Pahalgam shahrida sodir bo‘lgan hujum sabab bo‘lgandi. Unda 26 nafar tinch aholi, jumladan sayyohlar halok bo‘lgan. Dehli Pokiston tomonidan qo‘llab-quvvatlanayotgan qurolli guruhlarni ayblagan. Islomobod esa buni rad etgandi.
7-may kuni Dehli Pokiston va Kashmirdagi bir nechta obyektlarga raketa zarbalari bergan. Keyingi 3 kun davomida ikki davlat bir-birining aerodromlariga artilleriya va havo hujumlari uyushtirgandi. Ushbu hujumlarda Pokistonda kamida 51 kishi, jumladan, 11 askar va bir necha bola halok bo‘lganini ma’lum qilgan. Hindiston esa kamida 5 nafar harbiy halok bo‘lganini bildirgandi.
Izoh (0)