AQSHdan bir guruh demokrat qonunchilar, jumladan, to‘rt nafar senator va Vakillar palatasi a’zolari Ukrainani qo‘llab-quvvatlash uchun Polsha, Hindiston, Germaniya, Nepal va Birlashgan Arab Amirliklariga boradi. Bu haqda The Hill nashri xabar berdi.
“Kongressning mazkur kuchli delegatsiyasida AQSH Ukraina va NATOdagi ittifoqchilarini qo‘llab-quvvatlanishni qanday davom ettirish maqsadida Polshadagi AQSH harbiy rahbariyati hamda qo‘shinlari bilan uchrashish imkoni bo‘ladi”, — deyiladi xabarda.
Kongressmenlarning ta’kidlashicha, delegatsiya “global keskinlik kuchaygan hozirgi davrda” aloqalarni yaxshilash uchun Polsha, BAA, Hindiston, Nepal va Germaniyada bir qator muhim xorijiy yetakchilar bilan uchrashadi.
Safarga otlanadiganlar qatorida senatorlar Mark Kelli (Arizona shtati), Kirsten Gillibrand (Nyu-York shtati), Kori Buker (Nyu-Jersi shtati), Ed Marki (Massachusets shtati), shuningdek, Vakillar palatasi a’zosi Monder Jons (Nyu-York shtati) bor.
O‘tgan hafta senator Stiv Deyns va Vakillar palatasi a’zosi Viktoriya Sparts Kiyevga tashrif buyurgandi. Ularning tashrifi Rossiya tomonidan harbiy operatsiyalar boshlanganidan beri Amerika qonunchilarining birinchi tashrifi hisoblanadi. Shuningdek, AQSH prezident Jo Bayden o‘zi ham Kiyevga borishga tayyorligini ma’lum qilgan.
Fevral oxiridan buyon Ukrainaga ayrim xorij siyosatchilari tashrif buyurdi, xususan, Yevroittifoqning tashqi ishlar masalalari bo‘yicha oliy vakili Jozep Borrel, Yevrokomissiya rahbari Ursula fon der Lyayyen. Ular Kiyevga 8-aprel kuni kelgandi. Shuningdek, Buyuk Britaniya bosh vaziri Boris Jonson, Avstriya kansleri Karl Nexammer ham Kiyevga tashrif buyurgan.
Izoh (0)