Rossiya Tashqi ishlar vazirligi matbuot kotibi Mariya Zaxarova AQSHning Hindistonni diniy erkinlik huquqlarini buzayotganlikda ayblashi mamlakatdagi umumiy saylovlar vaqtida vaziyatni beqarorlashtirishga qaratilganini maʼlum qildi. Bu haqda “TASS” nashri xabar berdi.
“AQSHning Nyu-Dehlini diniy erkinlikni buzganlikda muntazam asossiz ayblashlari AQSHning milliy mentalitetni, Hindiston mamlakati rivojlanishining tarixiy kontekstini noto‘g‘ri tushunishi va Hindistonga nisbatan hurmatsizlikdan boshqa narsa emas. Vashington mamlakatda bo‘lib o‘tadigan umumiy saylovlarni murakkablashtirish uchun Hindistondagi ichki siyosiy vaziyatni beqarorlashtirish niyatida”, — degan Mariya Zaxarova.
Oldinroq Hindiston tashqi ishlar vaziri Subrahmanyam Jaishankar mamlakatda umumiy saylovlar iyun oyigacha bo‘lib o‘tishini maʼlum qilgan edi. Saylov oldidan hukumat shaffoflikni taʼminlash uchun xalqaro kuzatuvga ruxsat bergan.
Hozirga qadar Hindistonda umumiy 968 million kishi saylovchi sifatida ro‘yxatga olingan. Butun mamlakatda saylov komissiyalari xodimlari 14 million nafarga yetgan. Rasmiylar 1,2 million saylov kabinasi bilan dunyodagi eng yirik ovoz berish jarayonlari amalga oshirilishini bildirgan.
Qator G‘arb nashrlari hind hukumatini saylov arafasida etnik ozchiliklar va alohida diniy guruhlarning huquqlarini buzganlikda ayblagan. Fuqarolar saylov huquqidan foydalana olmayotganini maʼlum qilgan. Hukumatlar Dehlini terrorizm xavfi bahonasi bilan konstitutsiyaviy huquqlarni cheklamaslikka chaqirgan.
Izoh (0)