Hindistonda COVID-19 bo‘yicha rekordlar fonida kislorod tanqisligi yuzaga keldi. AQSh Hindistonga yordam ko‘rsatishga va’da berdi

Hindiston kasalxonalari mamlakatdagi koronavirus pandemiyasi fonida o‘tkir kislorod yetishmovchiligiga duch keldi, deb yozadi “Interfaks”. COVID-19’ga chalinish holatlari va uning oqibatidagi o‘limlar soni bo‘yicha ketma-ket uch kundan buyon rekord o‘rnatilmoqda.

So‘nggi bir kecha-kunduzda 346 786 kishi virusga chalingan. 23-aprel, juma kuni 2263 kishi vafot etgan, 24-aprel, shanba kuni — 2624 kishi.

Ayni vaqtda Jaypur kasalxonasining o‘zidagina bir kechada 20 kishi kislorod yetishmagani tufayli vafot etgan. Dehli kasalxonalari o‘z imkoniyatlari chegarasiga yaqinlashib qolgani haqida ogohlantirmoqda. Ko‘pchilik tibbiy muassasalarda bo‘sh joylar yo‘q, kislorod tanqisligi qayd etilmoqda.

Shifokorlarning aytishicha, yaqin vaqtlar ichida yana ko‘plab bemorlar vafot etadi: ular sun’iy nafas oldirish apparatlariga ulangan bo‘lib, kislorodsiz yashab keta olmaydi. Dehli bosh vaziri Arvind Kejrival to‘g‘ridan to‘g‘ri efirda ma’lum qilishicha, tibbiy kislorod ishlab chiqaruvchi korxonalar armiya yordamida hukumatga o‘tkazilishi kerak.

AQSh hukumati Hindistonda koronavirus infeksiyasiga chalinish darajasining keskin o‘sishi munosabati bilan mamlakatga qo‘shimcha ko‘mak ko‘rsatadi. Bu haqda AQSh davlat kotibi Entoni Blinken Twitter’da ma’lum qildi.

“Biz COVID-19’ning dahshatli avj nuqtasiga kelib qolgan Hindiston xalqiga hamdardlik bildiramiz. Sheriklarimiz bilan yaqindan hamkorlik qilyapmiz va biz Hindiston xalqiga va sog‘liqni saqlash xizmatlaridagi qahramonlarga qo‘shimcha yordam ko‘rsatamiz”, — deb yozdi u.

BBC qayd etishicha, 2021-yil boshida Hindiston hukumati pandemiyani nazorat ostiga oldik, deb o‘ylagan edi: fevral o‘rtalarida kasallanish ko‘rsatkichlari sutkasiga 11 mingtagacha pasaygan edi, mamlakatda vaksinatsiya ham boshlangan edi.

Ammo shundan keyin virusning yangi shtammlari paydo bo‘lishi natijasida kasallanish yana avj oldi. Mamlakatda ommaviy bayramlar o‘tkazilishi ham vaziyatga ta’sir qildi. Xususan, diniy Kumbxa Mela bayramida millionlab ziyoratchilar yig‘ilgandi.

Jons Hopkins universiteti ma’lumotlariga ko‘ra, Hindistonda pandemiya boshidan buyon 16,61 million kishi virusni yuqtirib olgan, 189 544 kishi vafot etgan.