Apple va Google kompaniyasi o‘zlarining smartfon ishlab chiqaruvchi korxonalarini Hindistonga ko‘chirayotgani to‘g‘risida xabarlar paydo bo‘ldi, deb yozadi Hi-Tech.Mail.ru.
Apple’ning hozirda Hindistonda zavodi mavjud bo‘lib, u yerda o‘rta darajadagi modellar yig‘iladi — ikki-uch yil oldingi modellar. Endilikda kompaniya birinchi bor aktual modellari, yangi iPhone 12 lineykasini ham Xitoydan tashqarida ishlab chiqarish niyatida. iPhone 12’ni Hindistonda yig‘ishga Apple’ning Xitoydagi asosiy sherigi — Tayvanning Foxconn kompaniyasi mas’ul bo‘ladi.
Reuters’ning hisobotida yozilishicha, iPhone 12’ni ishlab chiqarishni Hindistonga ko‘chirish ishlari Xitoy va AQSh o‘rtasida davom etayotgan savdo urushi sabab amalga oshirilmoqda. Umuman olganda, Apple Hindistonga 2017-yilda — ikki mamlakat o‘rtasidagi munosabatlar yomonlashishidan oldin e’tibor qaratgan, shu yili kompaniyaning mamlakatdagi birinchi zavodi ish boshlagan edi.
Shuningdek, Apple iPad planshetlari va Mac kompyuterlarini ishlab chiqarishni ham Hindiston va Vyetnamga ko‘chirmoqda. Shu bilan birga, Xitoydagi ishlab chiqarish ham to‘xtamaydi. Aftidan, kompaniya Xitoy hukumati tomonidan joriy etilishi mumkin bo‘lgan sanksiyalardan o‘zini himoylashga urinmoqda.
Google’ning vaziyati esa boshqacha. Kompaniya Hindiston bozorining potensialini ko‘rmoqda, shu sababli ushbu mamlakatdagi ulushini oshirish niyatida — 2020-yilda Hindistonga Pixel smartfonlarini yetkazib berish ikki barobarga oshgan.
Kompaniya o‘z maqsadiga erishish uchun birdaniga ikki yo‘nalishda ishlamoqda — o‘rta darajada smartfonlarni ko‘proq ishlab chiqaryapti va Hindistonda ishlab chiqarishni yo‘lga qo‘yishni rejalashtirgan. Shu bilan birga, ishlab chiqarilgan smartfon nafaqat Hindistonning ichki bozoriga, balki boshqa mamlakatlarga ham sotiladi.
Hindiston iqtisodiyoti tobora o‘sib borayotgani sabab xorij kompaniyalarini o‘ziga jalb etmoqda — bu kabi holat Xitoyda 2000-yillarda kuzatilgan edi.
Avvalroq AQSh va Xitoy o‘rtasidagi savdo urushi biroz tinchlanganiga qaramay, sanksiyalar ro‘yxatidan yana 9 ta kompaniya, xususan, Xiaomi ham o‘rin olgani to‘g‘risida xabar berilgandi. “Qora ro‘yxat”ga tushish amerikaliklarning ushbu Xitoy kompaniyalariga sarmoya kirita olmasligi va ularda ulushi bo‘lmasligini bildiradi. Taqiq 2021-yil 11-noyabrdan kuchga kiradi, bu vaqtga qadar investorlar o‘z aksiyalarini sotib yuborishi kerak.
Izoh (0)