Transport vazirligi Osiyo infratuzilmaviy investitsiyalar banki (OIIB) bilan hamkorlikda yangi loyihalarni amalga oshirish masalalari muhokama etilganini ma’lum qildi.
Ma’lum qilinishicha, vazirlik huzuridagi avtomobil yo‘llari qo‘mitasi raisi Jamshid Tursunov OIIBning investitsiyalar bloki rahbari Konstantin Limitovskiy boshchiligidagi delegatsiya vakillari bilan uchrashdi. Uchrashuvda avtomobil yo‘llarini rivojlantirish borasida bank moliyaviy ko‘magida amalga oshirilayotgan loyihalar va istiqboldagi hamkorlik yo‘nalishlari muhokama etildi.
Jamshid Tursunov avvalo, ushbu bank bilan hamkorlikda O‘zbekistonda yirik strategik loyihalar amalga oshirilayotgani munosabati bilan o‘z minnatdorligini bildirdi. Xususan, tomonlar A380 G‘uzor—Buxoro—Nukus—Beyneu avtomobil yo‘lining 150—228-kilometri (78 kilometr) qismini rekonstruksiya qilish loyihasi doirasida amalga oshirilayotgan ishlarning joriy holati yuzasidan fikr almashdi.
Shuningdek, Qoraqalpog‘iston Respublikasidagi (328,1 kilometr) hamda Xorazm viloyatidagi (188 kilometr) umumiy foydalanuvdagi mahalliy ahamiyatga ega 516,1 kilometr avtomobil yo‘llari qismlarini to‘la ta’mirlash loyihasi bo‘yicha hamda istiqbolda hamkorlikni yanada kengaytirish yuzasidan kelishuv amalga oshirildi.
Osiyo infratuzilmaviy investitsiyalar banki bilan 2026-yil 30-iyungacha amal qiladigan qarz bitimi imzolangan. Ushbu bank ishtirokida A380 G‘uzor—Buxoro—Nukus—Beyneu avtomobil yo‘lining 150 – 228-kilometrini rekonstruksiya qilish bo‘yicha Vaziarlar Mahkamasi qarori qabul qilingandi. Qurilish davri 5 yil etib belgilangan: 2 yili qurib bitkazish uchun, 3 yil kafolat/texnik nazorat va ta’minot uchun.
Mazkur loyiha doirasida 63,36 kilometr (81 foiz) uzunlikdagi avtomobil yo‘lining o‘ng qismi va 55,03 kilometr (70 foiz) uzunlikdagi avtomobil yo‘lining chap qismidagi mavjud asfalt qoplamasini kesish ishlari bajarildi. 63,30 kilometr (81 foiz) uzunlikdagi avtomobil yo‘lining o‘ng qismi va 44,04 kilometr (56 foiz) avtomobil yo‘lining chap qismida qum-shag‘al aralashmasidan 25 santimetr qalinlikda yo‘l asos qatlami yotqizildi. 63,3 kilometr (81 foiz) uzunlikdagi yo‘lning o‘ng qismi va 42,51 kilometr (55 foiz) uzunlikdagi yo‘lning chap qismida 20 santimetr qalinlikdagi M-75 markali sement-beton aralashmasi (STB) bilan asosning ustki qatlami yotqizildi.
Izoh (0)