Finlyandiya “O‘zbekistonning meteorologiya sohasidagi salohiyatini mustahkamlash” loyihasini amalga oshirish uchun mamlakatga grant ajratilishini ma’qulladi, deb xabar bermoqda “Dunyo” axborot agentligi.
O‘zbekistonning Rigadagi elchixonasi ma’lumotiga ko‘ra, grantning umumiy miqdori 2 million yevroni tashkil etadi. Grant loyihasini 2022—2025-yillarda amalga oshirish belgilangan.
Loyiha O‘zbekiston Gidrometeorologiya xizmati markazi (“O‘zgidromet”)ning salohiyatini modernizatsiya qilish, xodimlarni ilg‘or ko‘nikmalarga o‘rgatish, shu jumladan, tabiiy ofatlarni prognoz qilish, sohada axborot xizmatlari salmog‘ini oshirish, iqlim o‘zgarishiga moslashishni rag‘batlantirishni nazarda tutadi.
Finlyandiya tomonidan ushbu mamlakat meteorologiya instituti, O‘zbekiston tomonidan esa “O‘zgidromet” loyiha ijrochilari etib belgilangan.
Grant Iqtisodiy hamkorlik va taraqqiyot tashkiloti talablarini hisobga olgan holda ishlab chiqilgan.
Eslatib o‘tamiz, yaqinda Finlyandiya O‘zbekistonni 2024 yilgacha mo‘ljallangan Markaziy Osiyo uchun yangi strategiyasi doirasidagi mintaqa mamlakatlari taraqqiyotini qo‘llab-quvvatlash siyosati sohasidagi ustuvor sheriklar ro‘yxatiga kiritgan. Finlyandiya uchta asosiy yo‘nalish — qonun ustuvorligi, barqaror iqtisodiy rivojlanish va tabiiy resurslarni boshqarishni takomillashtirish bo‘yicha loyihalarni qo‘llab-quvvatlash niyatida ekani ta’kidlangan.
O‘zbekiston, Qirg‘iziston va Tojikistonga rejalashtirilgan umumiy ko‘mak miqdori qariyb 28 million dollarga teng.
Mavzuga doir:
- AQSh Xalqaro taraqqiyot agentligi O‘zbekistonda yoshlar bandligini ta’minlashga 10 mln dollar ajratadi
- Yaponiyaning JICA tashkiloti O‘zbekiston madaniy merosini arxivlash va raqamlashtirishga 490 ming dollar ajratadi
- OIIB O‘zbekistonda pandemiya davrida tadbirkorlikni qo‘llab-quvvatlash uchun 200 mln dollar ajratdi
Izoh (0)