O‘zbekiston delegatsiyasi Misrning Sharm ash-Shayx shahrida o‘tkazilgan Osiyo infratuzilmaviy investitsiya banki Boshqaruvchilar kengashining 8-yillik yig‘ilishida ishtirok etdi, deb xabar beradi “Dunyo” agentligi.
Qayd etilishicha, yig‘ilishning kun tartibidagi savollarga muvofiq, 25—26-sentyabr kunlari “Infratuzilma sohasida investitsiyalar yetishmovchiligini bartaraf etishda xalqaro moliya institutlarining roli” va “Markaziy Osiyoning suv-energetika muammosi: O‘zbekistonda barqaror rivojlanishni taʼminlash” mavzularida sessiyalar bo‘lib o‘tgan.
Bundan tashqari, bank boshqaruvchilari o‘rtasida biznes-sessiya o‘tkazilgan. Unda investitsiyalar, sanoat va savdo vaziri, O‘zbekistondan OIIB boshqaruvchisi Laziz Qudratov so‘zga chiqib, ishtirokchilarni mamlakatda investitsiya va tadbirkorlik faoliyati uchun yaratilgan qulay sharoitlar, joriy etilgan imtiyoz va preferensiyalar, shuningdek, mamlakatda konstitutsiyaviy darajada o‘rnatilgan investorlar huquqlarining kafolatlari bilan batafsil tanishtirgan.
O‘zbekistonning bankning navbatdagi yillik yig‘ilishini 2024-yil 25—26-sentyabr kunlari Samarqand shahrida o‘tkazish bo‘yicha taklifini maʼqullash to‘g‘risida OIIB Boshqaruv kengashining qabul qilgan qarori yig‘ilishning asosiy masalalaridan biri bo‘lgan.
Ovoz berish natijalariga ko‘ra, O‘zbekiston vakili Laziz Qudratov OIIB Boshqaruv kengashi raisi etib saylandi.
Iyul oyida Osiyo infratuzilmaviy investitsiyalar banki (OIIB) O‘zbekiston bilan hamkorlikni kengaytirish niyatida ekani ma’lum qilingandi. 2023-yil mart oyidan buyon Bank tomonidan energetika sohasida loyihalarni amalga oshirish doirasida davlat kafolatisiz 415 million dollari miqdoridagi 3 ta kredit liniyasi maʼqullangan.
Izoh (0)