2025-yil I yarmida Lex.uz qonunchilik bazasida eng ko‘p o‘qilgan hujjat O‘zbekiston Konstitutsiyasi bo‘ldi. Bu haqda Adliya vazirligi eʼlon qilgan hisobotda maʼlum qilindi.
Lex.uz platformasida jami 14 ming 544 ta amaldagi normativ-huquqiy hujjatlar mavjud. Shundan 541 tasi joriy yil yanvar-iyun oylarida qabul qilingan. Bazadan kunlik foydalanuvchilar soni 37–39 mingta atrofida.
Platformada olti oy davomida 10 ta hujjat eng ko‘p ko‘rilgan. Ular umumiy hisobda 516,6 ming marta o‘qilgan.
Eng ko‘p o‘qilgan hujjatlar ro‘yxatidan birinchi o‘rinni Konstitutsiya egallagan. Shu bilan birga, Jinoyat, Maʼmuriy javobgarlik va Mehnat kodekslari nisbatan ko‘proq o‘qilgan.
“Shaxsga doir maʼlumotlar to‘g‘risida”gi qonun beshinchi o‘rinda qayd etilgan. Oltinchi o‘rin “2022-2026-yillarga mo‘ljallangan Yangi O‘zbekiston taraqqiyot strategiyasi to‘g‘risida”gi prezident farmoniga berilgan.
O‘z navbatida yettilikka “Taʼlim to‘g‘risida” qonun kirgan. “Yo‘l harakat qoidalarini tasdiqlash to‘g‘risida”gi hukumat qarori sakkizinchi o‘rindan joy olgan.
Yakuniy ikki o‘rinni mahallalarda xavfsizlikni taʼminlashga oid prezident qarori va Xalq taʼlimi vazirligining xorijiy tillar sertifikatini tasdiqlash bo‘yicha qarori egallagan.
Avvalroq Adliya vazirligi 2025-yil I yarmida 316 ta qonunchilik hujjatlari jamoatchilik muhokamasiga qo‘yilganini ma’lum qilgandi.
Izoh (0)