Shavkat Mirziyoyev 9-mart kuni Osiyo infratuzilmaviy investitsiyalar bankining ushbu nufuzli moliyaviy institut prezidenti Szin Lisyun boshchiligidagi delegatsiyasini qabul qildi.
Ko‘p qirrali sheriklikni yanada kengaytirishning amaliy jihatlari ko‘rib chiqildi. Davlat rahbari keyingi yillarda bank bilan munosabatlarda yuksak darajaga erishilganini mamnuniyat bilan qayd etdi.
Hamkorlik portfeli 2 milliard dollarga yetdi. Transport, energetika, qishloq xo‘jaligi va kommunal soha, tadbirkorlikni qo‘llab-quvvatlash bo‘yicha muhim loyihalar amalga oshirilmoqda.
Osiyo infratuzilmaviy investitsiyalar banki prezidenti Szin Lisyun Yangi O‘zbekistondagi ortga qaytmas islohotlar dasturini yuqori baholadi va uni har tomonlama qo‘llab-quvvatlashga tayyorligini bildirdi.
Bank kambag‘allikka qarshi kurashish va eng avvalo qishloq joylarda ish o‘rinlarini yaratish, davlat-xususiy sheriklik va loyihalarni aralash tarzda moliyalashtirish mexanizmlarini joriy qilish, tadbirkorlikni qo‘llab-quvvatlashni kengaytirish va boshqa muhim yo‘nalishlarda O‘zbekiston bilan strategik sheriklikni rivojlantirishga intilishi qayd etildi.
Markaziy Osiyo mintaqasida strategik muhim infratuzilma loyihalarini ilgari surish masalalariga alohida e’tibor qaratildi. Keng ko‘lamli hamkorlik doirasidagi loyihalarni amalga oshirishni jadallashtirish va natijadorligini ta’minlashga qaratilgan yangi o‘rta muddatli Sheriklik dasturi va yo‘l xaritasini ishlab chiqish yuzasidan kelishib olindi.
Osiyo infratuzilmaviy investitsiyalar banki Xitoy tomonidan taklif qilingan xalqaro moliya instituti hisoblanadi. OIIBning asosiy maqsadlari Osiyo-Tinch okeani mintaqasida moliyaviy hamkorlikni rag‘batlantirish, Osiyoda yo‘llar va aeroportlar qurishdan tortib, aloqa antennalari va ekonom-sinfdagi uy-joylargacha bo‘lgan infratuzilma loyihalarini moliyalashtirishdan iborat.
Dastlab “O‘zaro anglashuv memorandumi” 21 davlat vakillari tomonidan imzolangan bo‘lsa, keyin ularga boshqa potensial ta’sischi a’zolar qo‘shildi. O‘zbekiston 2014-yil 14-oktabr kuni ushbu tuzilmaga a’zo bo‘lgan. 2022-yil holatiga ko‘ra, 89 ta davlat tashkilotga a’zo, shundan 57 tasi ta’sischi. Chexiya, Nigeriya, Iroq va Ukraina Osiyo infratuzilmaviy investitsiyalar bankiga qo‘shilish imkoniyatini ko‘rib chiqmoqda.
Izoh (0)