Osiyo infratuzilmaviy investitsiyalar banki (OIIB) O‘zbekiston bilan hamkorlikni kengaytirish niyatida. Bu haqda 4-iyul kuni Investitsiyalar, sanoat va savdo vaziri Laziz Qudratov va OIIB vitse-prezidenti Lyudger Shuknext bilan uchrashuvda aytib o‘tildi.
Uchrashuvda O‘zbekiston va OIIB o‘rtasidagi moliyaviy-texnik hamkorlikni kengaytirish, mavjud loyihalarni amalga oshirish bo‘yicha bajarilgan ishlarning bugungi holati muhokama qilindi. Xususan, energetika, infratuzilmaviy rivojlanish, transport va tibbiyot kabi yo‘nalishlarda umumiy qiymati 2,4 milliard dollardan ortiq bo‘lgan 13 ta loyihani o‘z ichiga olgan OIIBning O‘zbekistondagi joriy investitsiya portfeli hajmi o‘sishining ijobiy dinamikasi eʼtirof etildi.
“2023-yil mart oyidan buyon Bank tomonidan energetika sohasida loyihalarni amalga oshirish doirasida davlat kafolatisiz 415 million dollari miqdoridagi 3 ta kredit liniyasi maʼqullandi”, — deyiladi xabarda.
“O‘zbekiston biz bilan loyihalarning uch yillik sikli bo‘yicha hamkorlik qilayotgan birinchi davlatdir. Bizning asosiy eʼtiborimiz, albatta, infratuzilmani barpo etish, inson kapitalini mustahkamlash, xususiy sektorni rivojlantirish, shuningdek, iqlim o‘zgarishining salbiy oqibatlarini oldini olish bo‘yicha global masalalarni ilgari surishga qaratilgan. Mamlakatingiz bilan samarali hamkorligimizni yanada kengaytirishdan manfaatdormiz, — degan Lyudger Shuknext.
Maʼlumot uchun
- Osiyo infratuzilmaviy investitsiyalar banki ko‘p tomonlama rivojlanish instituti hisoblanadi.
- Uning maqsadi Osiyo-Tinch okeani mintaqasida moliyaviy hamkorlikni rag‘batlantirish, Osiyoda yo‘llar va aeroportlar qurishdan tortib, aloqa antennalari va arzon uy-joylar qirishgacha bo‘lgan infratuzilmaviy loyihalarni moliyalashtirishdir.
- Hozirgi kunda 80 dan ortiq davlat OIIBga aʼzodir.
Izoh (0)