O‘zbekistonda 10-martdan bugungi kunga qadar jami 4 419 km ta’mirlash ishlari amalga oshirildi. Bu haqda AOKAda o‘tkazilgan brifingda Avtomobil yo‘llari qo‘mitasi Axborot xizmati rahbari Nilufar Jumayeva ma’lum qildi.
Unga ko‘ra, bugungi kunda mamlakat hududida mavjud 42 371 km uzunlikdagi umumiy foydalanishdagi avtomobil yo‘llarida kuz-qish mavsumidan keyin hosil bo‘lgan nuqsonlarni bartaraf etish maqsadida ta’mirlash ishlari jadal ravishda olib borilmoqda.
Joriy yilning 10-mart kunidan bugungi kuniga qadar jami 4 419 km ta’mirlash ishlari amalga oshirilib, bu ishlarga 33 870 tonna asfalt-beton qorishma sarflangan.
Shundan, xalqaro ahamiyatdagi 657 km avtomobil yo‘lini ta’mirlash uchun 9 461 tonna asfalt-beton, davlat ahamiyatidagi 1 899 km avtomobil yo‘lini ta’mirlash uchun 14 676 tonna asfalt-beton, mahalliy ahamiyatdagi 1863 km avtomobil yo‘lini ta’mirlash uchun 9 734 tonna asfalt-beton qorishmasi yotqizilgan.
Toshkent shahrida yo‘llarni ta’mirlash ishlari bilan bog‘liq xarajatlarni amalga oshirish uchun 12 milliard so‘m ajratilishi aytilgandi. Har bitta tumanga 1 milliard so‘mdan taqsimlanadi.
Tahlil natijalariga ko‘ra, 2025-yilda joriy va kapital ta’mirlash talab qilinadigan ko‘chalar ro‘yxatini o‘z ichiga olgan manzilli ta’mirlash dasturi ishlab chiqildi. Dastur doirasida umumiy maydoni 65 ming kvadrat metrdan ortiq bo‘lgan yo‘llarni ta’mirlash rejalashtirilgan.
2025-yil yanvarida Toshkentning Yashnobod tumanida Kichik halqa avtomobil yo‘lining Maxtumquli ko‘chasiga tutashgan qismini qayta qurish ishlari nihoyasiga yetkazilgandi. Ishlar doirasida 5700 metr kvadrat yo‘l qoplamasi yotqizildi. Shuningdek, 800 metr suv chiqarish lotoklari o‘rnatildi. Shu bilan birga, 1825 metrga bordyur toshi qo‘yildi.
Izoh (0)