O‘zbekistonda 6-iyun kuni Qurbon hayiti namozi o‘qiladigan paytda aholi xavfsizligi ta’minlanadi.
IIV Jamoat xavfsizligi departamenti axborot xizmati rahbari Muzifa Sultonovaning ma’lum qilishicha, masjidlar va ularning atrofidagi hududlarda fuqarolarning xavfsizligi ta’minlanib, jamoat tartibining buzilishi hamda favqulodda holatlar sodir etilishiga yo‘l qo‘yilmasligi to‘liq nazoratga olingan.
Respublika hududidagi jami 2 091 masjidda ertalabki soat 05:00 dan hayit namozlari o‘qiladi va ularda taxminan 2 million nafardan ortiq kishi qatnashishi kutilmoqda.
Tadbir o‘tkaziladigan masjidlarda 15 mingdan ortiq videokuzatuv kameralari mavjud bo‘lib, hududiy ichki ishlar organlariga integratsiya qilingan.
Avtomobil yo‘llariga yondosh joylashgan masjidlar atrofidagi yo‘llarda transport vositalari harakatini vaqtincha cheklash choralari ko‘rilib, hayit namozi o‘qiladigan masjidlardan 150 metr uzoqlikda alohida avtoturargohlar tashkil etildi.
Shuningdek, respublika hududidagi 9 ming 421 qabristonga fuqarolarning tashrif buyurishlarini inobatga olib, jamoat xavfsizligini ta’minlash maqsadida 10 mingdan ortiq huquqni muhofaza qiluvchi organlar xodimlari va harbiy xizmatchilari jalb etiladi. Barcha yirik qabristonlarga tashrif buyuradigan ziyoratchilar avtotransportlari uchun alohida avtoturargohlar tashkil etildi.
O‘zbekistonda 6-iyun kuni Qurbon hayiti bayrami sifatida keng nishonlanadi. O‘zbekiston Musulmonlari idorasi bergan ma’lumotga ko‘ra, Toshkent shahridagi jome masjidlarida Qurbon hayiti namozi ertalab soat 05:10 da o‘qiladi. Qurbon hayiti namozi o‘qiladigan masjid atrofidagi ko‘chalar va yo‘llarda avtotransport vositalarining harakati soat 00:00 dan 08:00 gacha to‘xtatiladi.
Shu kuni Toshkentda jamoat transporti soat 03:00 dan o‘z harakatini boshlaydi. Toshkent metropoliteni soat 10:00 ga qadar yo‘lovchilarga bepul xizmat ko‘rsatadi.
Izoh (0)