Ўзбекистонда 6 июнь куни Қурбон ҳайити намози ўқиладиган пайтда аҳоли хавфсизлиги таъминланади.
ИИВ Жамоат хавфсизлиги департаменти ахборот хизмати раҳбари Музифа Султонованинг маълум қилишича, масжидлар ва уларнинг атрофидаги ҳудудларда фуқароларнинг хавфсизлиги таъминланиб, жамоат тартибининг бузилиши ҳамда фавқулодда ҳолатлар содир этилишига йўл қўйилмаслиги тўлиқ назоратга олинган.
Республика ҳудудидаги жами 2 091 масжидда эрталабки соат 05:00 дан ҳайит намозлари ўқилади ва уларда тахминан 2 миллион нафардан ортиқ киши қатнашиши кутилмоқда.
Тадбир ўтказиладиган масжидларда 15 мингдан ортиқ видеокузатув камералари мавжуд бўлиб, ҳудудий ички ишлар органларига интеграция қилинган.
Автомобиль йўлларига ёндош жойлашган масжидлар атрофидаги йўлларда транспорт воситалари ҳаракатини вақтинча чеклаш чоралари кўрилиб, ҳайит намози ўқиладиган масжидлардан 150 метр узоқликда алоҳида автотураргоҳлар ташкил этилди.
Шунингдек, республика ҳудудидаги 9 минг 421 қабристонга фуқароларнинг ташриф буюришларини инобатга олиб, жамоат хавфсизлигини таъминлаш мақсадида 10 мингдан ортиқ ҳуқуқни муҳофаза қилувчи органлар ходимлари ва ҳарбий хизматчилари жалб этилади. Барча йирик қабристонларга ташриф буюрадиган зиёратчилар автотранспортлари учун алоҳида автотураргоҳлар ташкил этилди.
Ўзбекистонда 6 июнь куни Қурбон ҳайити байрами сифатида кенг нишонланади. Ўзбекистон Мусулмонлари идораси берган маълумотга кўра, Тошкент шаҳридаги жоме масжидларида Қурбон ҳайити намози эрталаб соат 05:10 да ўқилади. Қурбон ҳайити намози ўқиладиган масжид атрофидаги кўчалар ва йўлларда автотранспорт воситаларининг ҳаракати соат 00:00 дан 08:00 гача тўхтатилади.
Шу куни Тошкентда жамоат транспорти соат 03:00 дан ўз ҳаракатини бошлайди. Тошкент метрополитени соат 10:00 га қадар йўловчиларга бепул хизмат кўрсатади.
Изоҳ (0)