Prezident Shavkat Mirziyoyevga diniy-maʼrifiy sohada amalga oshirilayotgan ishlar haqida axborot berildi. Bu haqda Prezident matbuot xizmati xabar berdi.
Barcha fuqarolarning huquq va erkinliklarini har tomonlama himoya qilish ko‘p millatli O‘zbekistondagi yangilanishlarning asosiy ustuvor yo‘nalishidir. Shunday ajralmas huquqlardan biri – din erkinligidir. Mamlakatda eʼtiqod qiluvchilar ibodat amallarini emin-erkin ado etishlari uchun barcha shart-sharoitlar yaratilmoqda.
Taʼkidlash joizki, Yangi O‘zbekiston siyosati nafaqat xalqimiz orasida, balki xalqaro jamoatchilikda ham munosib eʼtirofga sazovor bo‘lmoqda.
Mustaqillikning dastlabki yillarida Makka-yu Madinada muqaddas haj amalini ado etishga muyassar bo‘lgan vatandoshlar soni barmoq bilan sanoqli bo‘lgan bo‘lsa, bugungi kunda 15 mingdan ziyod o‘zbekistonlik muqaddas ziyoratga bordi.
O‘zbekiston prezidenti Shavkat Mirziyoyevning xalqimizga Qurbon hayiti tabrigi, Musulmonlar idorasi raisi muftiy Shayx Nuriddin Xoliqnazar bilan telefon orqali suhbat qilib, hojilar holidan xabar olgani bu yilgi haj mavsumining yorqin voqealaridan bo‘ldi.
Qisqa muddat ichida O‘zbekistonda diniy-maʼrifiy sohada malakali kadrlarni tayyorlash bo‘yicha kompleks tizim yaratildi. Olimlarimizning boy merosini o‘rganish va ommalashtirish maqsadida ilmiy tadqiqot markazlari faoliyat boshladi. Bunga misol sifatida O‘zbekiston xalqaro islom akademiyasi, Mir Arab oliy madrasasi, Hadis ilmi maktabi, Imom Buxoriy, Imom Termiziy, Imom Moturidiy xalqaro ilmiy tadqiqot markazlarini keltirish mumkin. Imom Buxoriy yodgorlik majmuasida keng ko‘lamli yangilash va obodonlashtirish ishlari olib borilmoqda.
Bugungi yig‘ilishda buyuk mutafakkirlarning asarlarini aholi, ayniqsa yoshlar orasida keng o‘rganish va targ‘ib qilish zarurligi alohida taʼkidlandi. Zero bu asarlarda islomning asl mohiyati, muqaddas dinimizning insonparvar g‘oyalari mujassam. Bu, ayniqsa, hozirgi tahlikali davrda, dunyoda turli kuchlar din mohiyatini buzishga va yoshlarni haqiqiy yo‘ldan adashtirishga urinayotgan bir paytda juda dolzarb.
Bu jarayonda ayni kunlarda muqaddas Makkada haj ibodatini ado etayotgan yurtdoshlarimizning ham katta o‘rni borligi taʼkidlandi. Yaqinda hojilar o‘z mahallalarida yosh avlod tarbiyasi va maʼnaviy kamolotiga munosib hissa qo‘shishga tayyor ekanliklarini bildirib murojaat qabul qildi.
Shuningdek, davlat rahbari bu ishlarda xalq va chet ellik mehmonlarni ajdodlarning bebaho merosi bilan keng tanishtirishga, maʼrifatli islom g‘oyalarini ilgari surishga xizmat qiladigan Islom sivilizatsiyasi markazi faol ishtirok etishi muhimligini taʼkidladi. Bugungi kunda tarixchi olim va ulamolar bilan birgalikda markaz faoliyatini yangi mazmun bilan boyitish ishlari olib borilmoqda.
Markazning kelgusidagi rejalari to‘g‘risida axborot berildi.
Izoh (0)