O‘zbekiston prezidenti yordamchisi Saida Mirziyoyeva Rossiya tomonining taklifiga binoan Moskva shahrida Rossiya prezidenti administratsiyasi rahbari Anton Vayno bilan uchrashuv o‘tkazdi.
Yuqori sur’atda rivojlanib borayotgan va aniq natijalar berayotgan O‘zbekiston-Rossiya hamkorligining bugungi holati va istiqbollari muhokama qilindi.
Oliy darajada erishilgan kelishuvlarni muvofiqlashtirish va amalga oshirishga alohida e‘tibor qaratildi. Kelishuvlar ijrosini monitoring qilish bo‘yicha yaratilayotgan mexanizm davlatlar rahbarlari tomonidan qo‘yilgan vazifalarni hal etish borasida Prezident administratsiyalari o‘rtasida hamkorlikning samarali vositasiga aylanishiga ishonch bildirildi.
Savdo-iqtisodiy va investitsiyaviy sheriklikning asosiy yo‘nalishlari, jumladan, innovatsion loyihalar va mintaqalararo aloqalar atroflicha muhokama qilindi.
Gumanitar sohadagi ikki tomonlama hamkorlikning ustuvor yo‘nalishlari va mehnat migratsiyasi masalalari yuzasidan fikr almashildi.
Tomonlarni qiziqtirgan barcha masalalar bo‘yicha yaqindan muvofiqlashtirish va birgalikda ishlash muhimligi ta’kidlandi.
Izoh (0)