“Lazgi. Muhabbat va qalb raqsi” balet spektakli Qozog‘istonda ham namoyish etildi. Bu haqda prezident yordamchisi Saida Mirziyoyeva xabar berdi.
Unga ko‘ra, 17-mart kuni Abay nomidagi Qozog‘iston milliy opera va balet teatri sahnasida qadimiy raqs — lazgi jonlangan. Bunday tadbirlar go‘zal o‘zbek san’atini namoyon etibgina qolmay, qardosh millatlar o‘rtasidagi do‘stlik, birodarlik rishtalarini yanada mustahkamlashga, o‘zaro munosabatlarni yangi bosqichga ko‘tarishga yordam berishi ta’kidlangan.
Qozog‘istonga qilgan avvalgi safarimiz chog‘ida “Lazgi. Muhabbat va qalb raqsi” baleti shu qardosh yurtda ham namoyish etilsa, deb niyat qilgandik. Ezgu niyatimiz ijobat bo‘ldi — 17-mart kuni Abay nomidagi Qozog‘iston milliy opera va balet teatri sahnasida qadimiy raqsimiz — lazgi jonlandi.
⠀
Bunday madaniy tadbirlar go‘zal san’atimizni namoyon etibgina qolmay, qardosh millatlar o‘rtasidagi do‘stlik, birodarlik rishtalarini yanada mustahkamlashga, o‘zaro munosabatlarni yangi bosqichga ko‘tarishga yordam beradi.
⠀
Biz, prezidentimiz tomonidan boshlab berilgan yaxshi qo‘shnichilik an’analariga sodiq qolgan holda, Markaziy Osiyo davlatlari bilan iqtisodiy, siyosiy va, albatta, madaniy sohalarda hamkorlikni kuchaytirishga o‘z hissamizni qo‘shishni maqsad qilganmiz. Xalqlarimiz o‘rtasida totuvlik, ahillik hukm sursa, ushbu mintaqa qudratli hamjihatlik markaziga aylanishi shubhasiz, deydi Saida Mirziyoyeva.
Ma’lumot uchun, 2021-yilda Saida Mirziyoyeva boshchiligidagi Madaniyat va san’atni rivojlantirish jamg‘armasi tomonidan Jahon merosi ro‘yxatiga kiritilgan lazgi raqsi balet ko‘rinishida sahnalashtirilgandi. 2022-yil 28–29-iyun kunlari “Lazgi” baleti Bursa shahridagi Merinos Otaturk sahnasida namoyish etilgan.
2023-yil sentyabrida Rossiya Katta teatrida ushbu balet premyerasi bo‘lib o‘tgan. 2024-yilning yanvarida Pekindagi Xitoy milliy opera teatri sahnasida “Lazgi. Muhabbat va qalb raqsi” balet spektakli namoyish etildi. Uch yillik gastrol safarlari davomida “Lazgi. Muhabbat va qalb raqsi” spektakli Dubay, Istanbul, Bursa, Dortmund, Moskva, Parij va Sankt-Peterburgda tomoshabinlar olqishiga sazovor bo‘lgan.
“Lazgi” Xorazm raqsi O‘zbekiston madaniy merosining elementi sifatida Insoniyatning nomoddiy madaniy merosi reprezentativ ro‘yxatiga kiritilgan. Bu haqdagi qaror 2019-yil 12-dekabr kuni YUNESKOning Nomoddiy madaniy merosni muhofaza qilish bo‘yicha hukumatlararo qo‘mitasining 14-sessiyasida qabul qilingan.
2024-yili Bokuda ochilgan ko‘rgazma doirasida O‘zbekistonning madaniy merosi bilan tanishuv “Lazgi — Muhabbat va qalb raqsi” spektaklidan boshlangan edi.
Izoh (0)