Afg‘onistonda ijtimoiy tarmoqlar va o‘yin platformalari foydalanuvchilari hibsga olina boshlandi. Ular Ezgulikni targ‘ib qilish va yovuzlikning oldini olish vazirligi tomondan “qonunga xilof faoliyat”da ayblanmoqda. Bu haqda Khaama press yangiliklar portali xabar berdi.
Ma’lumotlarga ko‘ra, vazirlik matbuot kotibi Saif Ul-Islam Xayber TikTok video platformasining ikki foydalanuvchisi tarmoqda o‘z harakatlaridan afsuslanayotganini ko‘rsatuvchi videolarni e’lon qilgan. Ulardan biri — mashhur bloger Xarun Pakora majburlab olingani taxmin qilinayotgan videoda vazirlik xodimlariga o‘zining hibsga olinishi TikTok’da ayollar bilan muloqot qilgani bilan bog‘liqligini tan oladi. U kelajakda bunday aloqalarni to‘xtatishga va’da berdi hamda Afg‘onistondagi va undan tashqaridagi ayollarni o‘zining jonli efirlariga boshqa qo‘shilmaslikka chaqirdi. Ijtimoiy tarmoq foydalanuvchilari Pakoraning qo‘lga olinish chog‘ida sochini oldirib tashlashganini xabar qilishdi.
13-may kuni Baglan viloyatidan bo‘lgan, TikTok’dagi bema’ni va hazil-mutoyibali jonli efirlari bilan tanilgan mashhur tiktoker Shir Ali Mobarez ham Bosh razvedka boshqarmasi (GDI) xodimlari tomonidan “ijtimoiy tarmoqlarda nomaqbul xatti-harakatlar”da ayblanib hibsga olingan.
11-may kuni Ezgulikni targ‘ib qilish va illatlarning oldini olish vazirligi bayonot berib, ijtimoiy tarmoqlardan “axloqqa zid va noqonuniy maqsadlarda” foydalanish qonuniy oqibatlarga olib kelishi haqida ogohlantirdi.
Nashrning ta’kidlashicha, vazirlik 2023-yildayoq Afg‘onistonda TikTok va PUBG’ni taqiqlab, ular “yoshlarni chalg‘itishi va buzishi”ni ta’kidlagan edi.
Khaama press ma’lumotlariga ko‘ra, 2021-yilda hokimiyat almashganidan keyin Afg‘onistonda mehnat bozori juda torayib ketgani sababli, ko‘plab yoshlar muqobil daromad manbalarini izlash uchun TikTok va YouTube kabi ijtimoiy tarmoqlar va video platformalarga murojaat qilishgan. Biroq ijtimoiy tarmoq foydalanuvchilariga nisbatan boshlangan qatag‘onlar ularni qolgan bir nechta tirikchilik vositalaridan mahrum qilishi mumkin.
“Ijtimoiy tarmoqlar va raqamli platformalar ustidan hokimiyat nazoratining kuchayishi Afg‘onistonda senzura kuchayishining umumiy tendensiyasidan va toliblar rejimining o‘zi e’lon qilgan mafkuraviy va diniy qadriyatlarga muvofiq onlayn faoliyatni tashkil etishga urinishlaridan dalolat beradi”, deya ta’kidlaydi portal.
Izoh (0)