Hosilning kamayishi va ekin maydonlari yetishmasligi Rossiyada kartoshka zaxiralari qisqarishiga sabab bo‘ldi. Oqibatda kartoshkaning ulgurji narxi yil boshidan beri 85 foizga, 2024-yilning bahoriga nisbatan esa 4,4 barobarga oshdi. Bu haqda “Kommersant” xabar berdi.
Chakana narxlar o‘tgan yilga nisbatan 2,8 barobar ko‘tarilgan. Ulgurji savdo ortidan chakana savdo ham narxlarni oshirmoqda. Xususan, aprel oyi oxiriga kelib, do‘konlardagi kartoshka narxi 1 kilogramm uchun 85,4 rublni (taxminan 13 500 so‘m) tashkil etgan. Bu ko‘rsatkich o‘tgan yilning shu davriga nisbatan deyarli uch barobar yuqori.
2024-yil hosiliga tegishli kartoshkaning ulgurji bozordagi o‘rtacha narxi aprel oxirida 1 kilogramm uchun 46,3 rublni (7300 so‘m) tashkil etgan. Bu yil boshidan beri 85,2 foizga oshganini anglatadi. Mutaxassislar bu narxni kuzatuvlar tarixidagi eng yuqori ko‘rsatkich deb baholamoqda.
2-may kuni kartoshkaning ulgurji narxi 1 kilogramm uchun o‘rtacha 51,1 rublga (8100 so‘m) baholangan. Bu bir oy ichida 20,5 foizga, o‘tgan yilning shu davriga nisbatan esa 4,4 barobarga oshgan.
“Rusprodsoyuz” tashkiloti esa 2-may holatiga ko‘ra ulgurji xaridlarda kartoshkaning o‘rtacha narxini 1 kg uchun 47,6 rubl (7 500 so‘m) deb baholamoqda. Narx bir oy ichida 25 foizga oshgan.
Ulgurji narxlar ortidan iste’mol narxlari ham oshib bormoqda
Rosstat ma’lumotlariga ko‘ra, kartoshkaning o‘rtacha narxi 1 kg uchun 85,4 rublni (13 500 so‘m) tashkil etgan. Yildan yilga bu ko‘rsatkich 2,8 barobarga oshgan. Chakana savdo kompaniyalari uyushmasi prezidiumi raisi Stanislav Bogdanov ta’kidlashicha, chakana sotuvchilar kartoshkaning eng arzon turlarini xarid narxidan ham past sotib, o‘rtacha 1 kg uchun 2 rubl yo‘qotmoqda.
Narxlarning o‘sishiga bir necha omillar sabab bo‘lmoqda
Bozor zaxiralarning kamayishi, omborlarning yetishmasligi, energiya sarfining yuqoriligi va talabning oshishi tufayli narxlarning ko‘tarilishini boshdan kechirmoqda, deydi “Rusprodsouz” tashkiloti ijrochi direktori Dmitriy Vostrikov.
Rossiya Qishloq xo‘jaligi vazirligiga ko‘ra, 2025-yilda kartoshka ekiladigan maydonlar, 2,3 foizga oshib, 286,3 ming gektarga yetadi. Ammo hosilni yig‘ib olish may oyining sovuqlari tufayli kechroq boshlanishi mumkin.
Bozordagi noaniqlik iyun oxiri — iyul oyi boshigacha saqlanib qoladi, bu vaqtda Rossiyada odatda kartoshka yig‘im-terimi boshlanadi, deydi “Kommersant” suhbatdoshi.
O‘zbekistonga qancha kartoshka import qilingan?
Statistika agentligi ma’lumotlariga ko‘ra, mamlakatga 2024-yilning yanvar—noyabr oylarida xorijdan qiymati 52,6 million dollarga teng bo‘lgan 627 ming tonna kartoshka import qilingan. Bunda eng ko‘p kartoshka eksport qilgan davlatlar quyidagilar:
- Qozog‘iston — 465,2 ming tonna;
- Qirg‘iziston — 71,3 ming tonna;
- Pokiston — 110,7 ming tonna;
- Afg‘oniston — 15,9 ming tonna;
- Eron — 3 ming tonna;
- Boshqa davlatlar — 1,6 ming tonna.
Izoh (0)