Qirg‘izistonning sobiq prezidenti Almazbek Atambayev 2013-yilda jinoiy “avtoritet” Aziz Batukayevni noqonuniy ozod qilish ishi bo‘yicha qayta aybdor deb topildi. Bu haqda uning advokati Sergey Slesarev ma’lum qildi.
“Bishkekning Pervomayskiy tuman sudi Atambayevni jinoiy avtoritet Aziz Batukayevni noqonuniy ozod qilish ishi bo‘yicha aybdor deb topdi. Biroq jinoyat muddati o‘tganligi sababli unga jazo tayinlanmadi”, dedi Slesarev.
Atambayev 2011-2017-yillarda Qirg‘iziston prezidenti lavozimida ishlagan va 2019-yil iyunida daxlsizlik huquqidan mahrum etilgan. Hibsga olinganidan so‘ng unga qarshi bir nechta jinoiy ish qo‘zg‘atildi.
2020-yil 23-iyunda Bishkekning Pervomaysk tuman sudi Atambayevni 2013-yilda jinoiy avtoritet Aziz Batukayevni noqonuniy ozod qilish ishi bo‘yicha mol-mulkini musodara qilgan holda 11 yil-u 2 oyga ozodlikdan mahrum qilishga hukm etgan edi. Keyinchalik Atambayev Qirg‘iziston Jinoyat kodeksining “mansab mavqeyini suiiste’mol qilish” va “korrupsiya” moddalarida nazarda tutilgan jinoyatlarni sodir etishda aybsiz deb topildi. Shuningdek, sud uni 2020-yil oktyabrida ommaviy tartibsizliklarni tashkil etish ishi bo‘yicha jinoyat tarkibi yo‘qligi sababli oqlagan.
Atambayevning ishi yangi ochilgan holatlar bo‘yicha qayta ko‘rib chiqish uchun yuborilgan edi. Sud qaroriga ko‘ra, Atambayevga davolanish uchun Qirg‘izistonni tark etishga ruxsat berildi. U 2023-yil 14-fevralda koloniyadan ozod qilindi va ertasi kuni xorijga uchib ketdi.
Qirg‘izistonda 2019-yil avgust oyida Qo‘ytosh qishlog‘ida sodir bo‘lgan tartibsizliklar bo‘yicha sud bo‘lib o‘tayotgani, ayblov tomoni sobiq prezident Almazbek Atambayevni 11 yilga ozodlikdan mahrum etishni so‘ragani xabar qilingandi.
Izoh (0)