Bishkekning Pervomayskiy tuman sudida Qirg‘izistonda 2020-yil oktabr oyida yuz bergan tartibsizliklar ishi bo‘yicha dastlabki sud muhokamasi boshlandi. Bu haqda Qirg‘iziston sotsial-demokratik partiyasi raisi o‘rinbosari Qunduz Joldubayeva “Interfaks”ga ma’lum qildi.
Uning so‘zlariga ko‘ra, jarayon yopiq rejimda olib borilmoqda. Sudga ichki ishlar vazirining sobiq o‘rinbosari Kursan Asanov, prezident apparati sobiq rahbari Farid Niyozov, “Turon” partiyasi yetakchisi Jenish Moldokmatov olib kelindi. Parlamentning sobiq deputati Ravshan Jenbekov va mamlakatning sobiq prezidenti Almazbek Atamboyev esa sudga keltirilmadi.
2020-yil 4-oktabrda bo‘lib o‘tgan parlament saylovlaridan so‘ng, Bishkekda ovoz berish natijalariga qarshi boshlangan norozilik namoyishlari tartibsizliklarga aylanib ketgandi. Ular ovoz berish natijalari bekor qilinishga va mamlakatda hukumat almashishiga olib keldi. 15-oktabr kuni So‘ronboy Jeenbekov prezidentlikdan ketdi. 10-yanvar kuni bo‘lib o‘tgan navbatdan tashqari prezidentlik saylovlarida Sadir Japarov 79 foizdan ortiq ovoz bilan g‘alaba qozondi.
Iyul oyida Atambayev Bishkek markazida 2020-yil 9-oktabrdagi tartibsizliklarni uyushtirganlikda ayblandi, o‘shanda u tarafdorlari bilan shahar markazidagi mitingda qatnashgan edi. Biroq, muxolifatchi siyosatchi, Qirg‘izistonning amaldagi prezidenti Sadir Japarovning tajovuzkor tarafdorlari bu harakatning o‘tkazilishiga to‘sqinlik qilgan. Sobiq prezident maydondan chiqib ketayotgan paytda noma’lum shaxs Atambayevning mashinasiga bir necha bor o‘q uzgan.
10-oktabr kuni Atambayev ommaviy tartibsizliklar uyushtirganlik ishi doirasida hibsga olingan va Milliy Xavfsizlik davlat qo‘mitasining tergov izolyatoriga joylashtirilgan. U bilan birga uning maslahatchisi Farid Niyozov va ikki xavfsizlik xodimi hibsga olingan. Milliy xavfsizlik davlat qo‘mitasining xabar berishicha, 6-oktabrga o‘tar kechasi Bishkekning Pervomayskiy sudi sudyasiga nisbatan zo‘ravonlik ishlatilgan va Atambayevga nisbatan ehtiyot chorasini o‘zgartirish to‘g‘risidagi qaror bosim ostida imzolangan.
Iyun oyida Atambayev jinoyat avtoriteti Aziz Batukayevni noqonuniy ravishda ozod qilganlikda ayblanib, 11 yil-u ikki oyga ozodlikdan mahrum qilindi, u shuningdek, 2019-yil avgust oyida Koy-toshda sodir etilgan to‘qnashuv haqidagi ishning asosiy ishtirokchisi hisoblanadi.
Izoh (0)