AQSHning xorijiy yordamlarni qisqartirishi Yaqin Sharq mintaqasidagi ta’sirini susaytirishi mumkin. Bu haqda Politico gazetasi tahlilchilar, amaldorlar va gumanitar xodimlarga asoslanib xabar qilmoqda.
Gazeta keltirgan hukumat ma’lumotlariga ko‘ra, faqat 2023-yilning o‘zida mintaqa davlatlari AQSH Xalqaro taraqqiyot agentligi (USAID) orqali jami 4 milliard dollarlik yordam olgan. Umuman olganda, 2010-yildan 2023-yilgacha bo‘lgan davrda USAID Yaqin Sharq mamlakatlariga 40 milliard dollar miqdorida yordam ko‘rsatgan.
“Bu keskin qadam siyosiy beqarorlik, insonparvarlik va iqtisodiy muammolardan aziyat chekayotgan notinch mintaqadagi mamlakatlar ahvoliga ta’sir ko‘rsatadi... U Vashingtonning Yaqin Sharqdagi nufuziga putur yetkazishi mumkin”, deyiladi gazeta xabarida.
Ta’kidlanishicha, Misr, Isroil va Iordaniya AQSH yordamining asosiy oluvchilari hisoblanadi. Biroq moliyalashtirishning qisqarishi ta’siri hali ham AQSH bosqini oqibatlarini yengib o‘tayotgan va “Islom davlati” terrorchilik guruhiga qarshi kurashayotgan Iroqda, hukumat o‘zgargan Suriyada, fuqarolik mojarosidan aziyat chekayotgan Yamanda, Isroil harbiy operatsiyalar olib borayotgan G‘azo va Livanda ham sezilarli bo‘ladi.
AQSH davlat kotibi Marko Rubio turli mamlakatlarga 215 million dollarlik tashqi yordam ajratishni bekor qilgani xabar qilingandi.
Izoh (0)