Prezident Shavkat Mirziyoyev Surxondaryo viloyatiga tashrifi davomida jurnalistlar bilan uchrashuvda Mozori-Sharif—Kobul—Peshavor temiryo‘li qurilishi ahamiyati, loyihaning iqtisodiy, geografik, siyosiy jihatdan foydasi va boshqa tafsilotlari haqida gapirdi. Bu haqda “Gazeta.uz” xabar bermoqda.
Davlat rahbarining ta’kidlashicha, O‘zbekiston uchun “har doim eng muhim vazifalardan biri chegaralar uzoq yillar davomida yopiq bo‘lganiga qaramay, dengiz portlariga chiqish bo‘lgan”.
“Men buni asr loyihasi deb atayman... Xabaringiz bor, Toshkentda O‘zbekiston, Afg‘oniston va Pokiston vakillari ushbu ‘asr loyihasi’ga imzo chekdi. Oradan 2—3 oy o‘tib men Jahon banki rahbariyati bilan uchrashdim, ular birinchi qadamlar — loyihalash ishlari uchun 35 million dollar ajratishga rozi bo‘ldi”, — degan Prezident.
Uning so‘zlariga ko‘ra, yirik banklar bunday loyihalar uchun puxta tahlillardan so‘ng mablag‘ ajratadi. Unga ko‘ra, “Janubiy va Markaziy Osiyoni bog‘laydigan yo‘l, siyosiy va iqtisodiy jihatlarni hisobga olgan holda, Afg‘oniston iqtisodiyotining rivojlanishiga olib keladi”. Shavkat Mirziyoyevning qo‘shimcha qilishicha, barcha tranzit pullari Afg‘oniston xalqiga tushadi, O‘zbekistonga foydasi — Eron va Pokiston portlariga yo‘llar ochilishidir.
“Tasavvur qiling, bitta o‘zbek konteynerini Eron yoki Pokiston orqali tashish 3—4 baravar arzonlashadi, vaqt 4—5 baravar qisqaradi... Eksport qilish uchun yo‘l kerak. Yo‘l qisqa va arzon bo‘lganida, barqaror iqtisodiy rivojlanish ta’minlanadi, bu tadbirkorlarga foyda olib keladi. Ular Toshkentga bormaydi, aksincha, toshkentliklar bu yerga keladi. Men xalqaro savdo markazini qurishni nega buyurgan edim — afg‘on xalqi bizning mahsulotlarimizni vositachilar orqali emas, balki birinchi qo‘ldan sotib olishlari uchun”, — deya tushuntirgan davlat rahbari.
Prezident, shuningdek, O‘zbekiston—Qirg‘iziston—Xitoy va Mozori-Sharif—Kobul—Peshavor temiryo‘llari mamlakat tarixida qoladigan eng yirik infratuzilma loyihalaridan biriga aylanishini ta’kidlagan.
Mavzuga doir: Xitoy—Qirg‘iziston—O‘zbekiston temiryo‘li qurilishi Qozog‘iston va Rossiya manfaatlariga mos kelmaydi — ekspert
“Kelajakda yosh tadbirkorlarimiz biz kabi qiynalib yurmaydi. Hozir tadbirkorlarimiz qaysi yo‘ldan o‘tmasin pul to‘lamoqda, boshqa yo‘l yo‘q...”, — degan davlat rahbari.
Eslatib o‘tamiz, 2-fevral kuni O‘zbekiston—Afg‘oniston—Pokiston o‘rtasidagi yuqori darajadagi muzokaralar natijalari bo‘yicha O‘zbekistonga boshqa bozorlarga chiqish uchun “eng qisqa va eng arzon yo‘l” bo‘ladigan Mozori-Sharif—Kobul—Peshovar temiryo‘lini qurish bo‘yicha qo‘shma harakatlar rejasi (“Yo‘l xaritasi”) qabul qilingan.
Temiryo‘l qurish loyihasini moliyashtirish uchun O‘zbekiston, Afg‘oniston va Pokiston davlat rahbarlari nomidan qo‘shma murojaati asosida AQSh Xalqaro taraqqiyot moliya korporatsiyasining va boshqa xalqaro moliya institutlari mablag‘larining jalb etilishi ko‘zda tutilgan.
Temiryo‘l qurilishi 2022-yilning sentabr oyida boshlanishi rejalashtirilgan.
Izoh (0)