“Rak bo‘lib qoldim, ikki yil umrim qolibdi, desam ham unashmagan”. Rahmonali Suropov “Qalpoq”ning Alfiya kampir tufayli “zapret”ga tushgani haqida (video)

“Qalpoq”dagi Maraymamat — aktyor Rahmonali Suropov “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Suhbat davomida aktyor Rahmonali Suropov “Qalpoq” ko‘rsatuvi “zapret”ga uchragan vaqtda majburan o‘zini rak qilib ko‘rsatgani, shunda ham hech qanday natija bo‘lmagani haqida so‘zlab berdi.

“Qalpoq” avvallari juda ham ko‘p taqiqqa uchragan. “Xinoli qor” serialiga parodiyamiz — “Qalpoqli qor”dan keyin biz ancha ko‘tarildik, juda omadli bo‘ldi, 10 ta ko‘rsatuv o‘rnini bosib ketdi.

Keyin “Yoshlar” kanalida kutilmaganda to‘xtatib qo‘yishdi. Direktori oldida kechqurun 12 gacha o‘tirardim, o‘sha paytda orqasi uzun kompyuter edi, shu kompyuterda direktor o‘yin o‘ynab o‘tirardi. Men ham o‘sha xonada o‘tiraverardim. Keting, “Qalpoq”qa tepadan ruxsat berishmagan, derdi. U hech qanaqa tepadan kelgan buyruq emasdi, aniq edi-da.

Tomog‘im har doim qizarib yurardi. Allergik, hozir ham bor, buqog‘im ham bor ekan. Keyin rak bo‘ldim deb, qog‘oz to‘g‘irlatib kelganman, astag‘firulloh. “Rak bo‘lib qoldim, aka, yana ikki yil umrim qolibdi. Shuni o‘tkazing”, deganman.

Alfiyani chiqarmay qo‘yishgan. Alfiya uchun shunaqa qilib borganman. Uning o‘zi ham biladi. O‘shanga ham ko‘nmagan. Keyin u bo‘shadi, biz “O‘zbekiston” kanaliga o‘tdik. “Qalpoq” yana efirga ketishni boshladi.

Shunaqa holatlar bo‘lgan. Tanish-bilishchilik holatlari. Hamma hajviy ko‘rsatuvlar ketardi, lekin “Qalpoq”ni to‘xtatib qo‘yishgan edi. “Qalpoq” o‘sha vaqtlarda 6 oy mobaynida efir yuzini ko‘rmagan.

Men har kuni direktorning oldiga borardim, kechqurun 12-1 gacha kutib o‘tirardim. Har kuni ahvol shu edi. O‘shanda ham rahmi kelmagan. Keyin boshqa kanalga o‘tganmiz. Bizga Abdulla Oripovning qizi Yulduz Oripova yordam bergan. Iltimos qilganman, kirib bir og‘iz aytgan va ko‘rsatuv efirga ketgan. Baribir tanishingiz bo‘lishi kerak ekan-da.

Hozir ham shundaydir, bilmadim. Lekin “Qalpoq” muntazam efirga ketib turibdi. Hozir internet chiqib ketdi, odamlar televideniyega ham unchalik e’tibor bermayapti. Lekin televideniye baribir televideniye-da. Qishloqlarda internet yo‘qlar qancha, ko‘rishadi.

Alfiya tatar kampirni o‘ynardi, tepada bir tatar millatiga mansub kattakon bor ekan. “Nega bizning millatimizning ustidan kuladi, bizda kampirlar unaqa paypoq kiymaydi-yu?”, degan emish. Alfiyasiz bo‘lmaydi, usiz chiroyli chiqmaydi deb borganman, lekin hisobga olishmagan.

Rahmonali Suropov, aktyor, “Qalpoq” hajviy ko‘rsatuvi asoschisi